لایپیزیگ پاشەکشەی کرد؛ رکابەری داهاتووی بارسێلۆنا لە خوان گامپەر دیاریی دەکرێت

یاریگا –

یانەی ئایاکس ئەمستردام وەکوو ئەگەرێکی بەهێز بۆ رکابەریی بارسێلۆنا لە جامی خوان گامپەر دەردەکەوێت.

یانەی بارسێلۆنا نزیکە لە یەکلاکردنەوەی ناوی ئەو تیمەی کە لە جامی نەریتیی خوان گامپەردا رووبەڕووی دەبێتەوە و ئێستا ئایاکس بەربژێری سەرەکییە، دوای ئەوەی یانەی رێد بۆڵ لایپزیگ بەهۆی جەنجاڵی خشتەی یارییەکانیەوە پاشەکشەی کرد.

ئەم یارییە گرنگییەکی تایبەتی دەبێت، چونکە وەکوو یادکردنەوەی 10 ساڵەی کۆچی دوایی یۆهان کرۆیف دەبێت، کە کەسایەتییەکی ئەفسانەیی و هاوبەشی هەردوو یانەکەیە. کاریگەرییەکانی کرۆیف لەسەر ناسنامەی بارسێلۆنا، بەتایبەتی شێوازی یاریی هێرشبەرانە و کۆنترۆڵکردنی تۆپ تاوەکوو ئێستاش وەکوو بنەمایەکی سەرەکی لە نێو یانەکەدا ماوەتەوە، ئەمەش ئایاکس دەکاتە رکابەرێکی سیمبولی و گونجاو.

دانوستانەکانی نێوان هەردوو یانە لە قۆناخێکی پێشکەوتوودان و چاوەڕوان دەکرێت بەم زووانە بڕیاری کۆتایی بدرێت. پەیوەندییە مێژوویی و سۆزدارییە بەهێزەکەی نێوان بارسا و ئایاکس، کە بە قووڵی بە ناوی کرۆیفەوە بەستراوەتەوە، رۆڵێکی سەرەکی هەبووە لە هەڵبژاردنی ئەم یانەیەدا.

هەروەها یارییەکە لایەنێکی دیکەی وەرزشیی سەرنجڕاکێشی دەبێت، ئەویش رووبەڕووبوونەوەی فرێنکی دی یۆنگە بەرامبەر یانە کۆنەکەی بۆ یەکەمجار لەوەتەی لە ساڵی 2019 لە ئایاکسەوە پەیوەندی بە بارسێلۆناوە کردووە.

وەکوو هەمیشە، جامی گامپەر وەکوو مەراسیمی ناساندنی گەورەی پێکهاتەی بارسێلۆنا بۆ وەرزی نوێ دەبێت و هەلی یەکەم بینینی یانەکە دەدات بە هاندەران پێش دەستپێکردنی کێبڕکێ فەرمییەکان.