دیمەنێکی دەگمەن لە مۆندیال؛ دوای یارییە شێتانەکەیان، یاریزانانی ئینگلتەرا و فەرەنسا پێکەوە نزایان کرد

یاریگا –

دوای یارییەکی پڕ گۆڵ و مێژوویی کە بە ئەنجامی 6-4 لە بەرژەوەندیی ئینگلتەرا کۆتاییهات، یاریزانانی هەردوو هەڵبژاردەی ئینگلتەرا و فەرەنسا رکابەرییەکانی نیو یاریگایان وەلانا و ساتێکی سۆزداری و یەکگرتووییان لەسەر چیمەنی یاریگای مەیامی تۆمار کرد.

بازنەی نزا و پارانەوە لە چەقی یاریگادا
تەنیا چەند ساتێک دوای کۆتاییهاتنی یاریی دیاریکردنی پلەی سێیەمی مۆندیال، حەوت یاریزان لە هەردوو هەڵبژاردەکە شانبەشانی یەکتر وەستان و بازنەیەکیان پێکهێنا، سەریان داخست و پێکەوە نزایان کرد.

ئەو یاریزانانەی لەم بازنەیەدا بەشدار بوون پێکهاتبوون لە: بوکایۆ ساکا ،پاڵەوانی یارییەکە و خاوەنی هاتریک، ئیبرێچی ئێزێ لە ئارسیناڵ، ترێڤۆ چالۆبا لە چێڵسی، مارک گێی لە مانچێستەر سیتی، لەگەڵ یاریزانە فەرەنسییەکانی وەکوو ژان فیلیپ ماتێتا و ماکسێنس لاکروا لە کریستاڵ پاڵاس و دایۆت ئۆپامێکانۆی بەرگریکاری بایرن میونشن. ئەم دیمەنە بە خێرایی لە تۆڕە کۆمەڵایەتییەکان بڵاوبووەوە و بووە جێگەی ستایشی هاندەرانی هەردوو هەڵبژاردەکە و جیهان.

کوڕانی ئینجیل؛ باوەڕ وەکوو هاندەرێک بۆ سەرکەوتن
هەرچەندە بینینی ئەم جۆرە دیمەنانە لە نێوان دوو تیپی رکابەردا باو نییە، بەڵام ئایین رۆڵێکی گرنگ لە ژیانی بەشێک لەم یاریزانانەدا دەگێڕێت. ساڵی رابردوو، نۆنی مادوێکێ، ئەستێرەی ئارسیناڵ و ئینگلتەرا ئاشکرای کرد کە چۆن خۆی و نۆ لە هاوڕێکانی پێش یارییەکان پێکەوە نزا دەکەن و دەقەکانی ئینجیل دەخوێننەوە، کە لە تۆڕە کۆمەڵایەتییەکاندا بە کوڕانی ئینجیل  ناسراون.

مادوێکێ پێشتر گوتبووی؛

ئەوە شتێکی نایابە کە لە نێو پێکهاتەیەکداین شەرم لە جێبەجێکردنی ئایینەکەمان ناکەین. ئێمە بڕوامان وایە ئەمە هێزێکی گەورەمان پێدەبەخشێت کاتێک دەچینە نێو یاریگا و دەزانین کە بەتەنیا نین.