بێڕێزیمان پێکرا؛ کۆرتوا وەڵامی ئەو رەخنانە دەداتەوە کە پێش یارییەکەی بەرامبەر ئەمریکا ئاڕاستەی بەلجیکا کرابوون

یاریگا –

رکابەرەکەی ئیسپانیا لە قۆناخی 8 بە متمانەیەکی نوێکراوەوە دەگات و لە چەقی زیندووبوونەوەکەی بەلجیکا تیبۆ کۆرتوا وەستاوە.

بەلجیکا لە دوای کۆتاییهاتنی “نەوەی زێڕین”ـە بەناوبانگەکەیەوە، تووشی گۆڕانکارییەکی گەورە بووە. ئەو تیمەی کە لە دەوری ئێدێن هازارد دروست ببوو، کێڤن دی برۆین و رۆمێلو لوکاکو سەرکردە سەرەکییەکانی بوون، بە شێوەیەکی بەربڵاو بووەتە بەشێک لە رابردوو. هازارد دوای بێئومێدبوونی لە قەتەر لە تۆپی پێی نێودەوڵەتی خانەنشین بوو، لە کاتێکدا دی برۆین و لوکاکو لەم مۆندیالەدا رۆڵێکی زۆر بچووکتر دەگێڕن.

دی برۆین لە قۆناخی 16 بەرامبەر ویلایەتە یەکگرتووەکان هیچ بەشدارییەکی نەکرد، لە کاتێکدا لوکاکو بە پلەی یەکەم وەکوو یاریزانی یەدەکی کاریگەر بەکارهێنراوە، ئەگەرچی توانیویەتی گۆڵیش بکات. یاریزانە دێرینەکانی وەکوو ئاکسێل ڤیتسێل و تۆماس مونیێ ناوبانگی پێشووی خۆیان لەدەستداوە، چونکە رودی گارسیای راهێنەر دوودڵییەکی کەمی نیشاندا لە تێپەڕاندنی ناوە ناسراوەکان. تاوەکوو ئێستا، ئەنجامەکان بڕیارەکانی ئەویان سەرڕاست کردووەتەوە.

لە چەقی سەرهەڵدانەوەی بەلجیکادا کۆرتوا هەیە. گۆڵپارێزەکەی ریال مەدرید لە ماوەی دەسەڵاتی دۆمێنیکۆ تێدێسکۆدا بە شێوەیەکی کاریگەر لە تیمی نیشتمانی دوورکەوتبووەوە، ئەمەش دوای مشتومڕێکی ئاشکرای نێوان هەردوولایان. نەبوونی ئەو هاوكات بوو لەگەڵ پاڵەوانییەتیی یۆرۆ، کاتێک خەریکی چاکبوونەوە بوو لە پێکانێکی سەختی ئەژنۆ.

ماوەی تێدێسکۆ نائومێدکەربوو و بەلجیکا بە خێرایی رودی گارسیای لەبری ئەو دانا. یەکێک لە یەکەمین بڕیارەکانی گارسیا گەڕاندنەوەی کۆرتوا بوو وەکوو ژمارە 1ـی بەلجیکا و لەو کاتەوە تیمەکە بە شێوەیەکی بەرچاو بەهێزتر دەرکەوتووە.

دوای بردنەوەکەی بەرامبەر ویلایەتە یەکگرتووەکان، کۆرتوا وەڵامی ئەو رەخنانەی دایەوە کە پێش یارییەکە ئاڕاستەی بەلجیکا کرابوون و گوتی:

لەم رۆژانەی دواییدا بێڕێزیمان پێکرا. خەڵک دەیانگوت ویلایەتە یەکگرتووەکان بە ئاسانی لێمان دەباتەوە و ئێمە چیدی هەمان تیمی پێشوو نین. پێم وایە ئەمڕۆ نیشانماندا کە هێشتا تیمێکی باشین. ئایا ئەوەی نووسرابوو کاریگەری لەسەر من هەبوو؟ لە راستیدا نەخێر. خوێندمەوە و بە نوکتە وەرمگرت. لە راستییا پێش ئەم یارییە هەستم بە متمانەیەکی زیاتر دەکرد لەچاو یارییەکەمان بەرامبەر سێنیگال. ئەوان تیمێکی باشتریان لە ویلایەتە یەکگرتووەکان هەیە و پێم وایە ئەمڕۆ ئەوەمان سەلماند.

لەم نێوەندەدا، نەوەی نوێی بەلجیکا دەستیان بە گرتنەدەستی کۆنترۆڵی تیمەکە کردووە. لیاندرۆ ترۆسارد، کە ئێستا دەکرێت بگوترێت یاریزانی دیاری بەلجیکایە، رۆڵی سەرکردایەتی گرتووەتە ئەستۆ لەپاڵ یوری تیلیمانس، چارڵز دی کێتلارێ، ماکسیم دی کویپەر و ئامادۆ ئۆنانا، ئەگەرچی ئۆنانا بەهۆی تووشبوونی بە پێکانێکی سەختەوە یارییەکەی بەرامبەر ئیسپانیا لەدەست دەدات.

یاریزانانی دیکە کە ئەزموونێکی نێودەوڵەتی پێشووی سنوورداریان هەیە وەکوو براندن میشێل، نیکۆلاس راسکین و دۆدی لۆکیباکیۆ لە پلانەکانی گارسیادا پێش ناوە باوەکانی وەکوو ئارسەر تیاتی، هانس ڤاناکێن و جێرێمی دۆکو کەوتوون.
دەرئەنجامەکە بریتییە لە تیمێکی بەلجیکی کە بە چڕییەکی زیاتر، بڕوایەکی نوێکراوە و ناسنامەیەکی روونترەوە یاری دەکات. بە گەڕانەوەی کۆرتوا بۆ نێوان ستوونەکان، بەلجیکا بەرەو رووبەڕووبوونەوەکەی بەرامبەر ئیسپانیا هەنگاو دەنێت کاتێک دەکرێت بگوترێت لە باشترین ئاستی چەند ساڵی رابردوویاندایە.