یاریگ –
مانچێستەر سیتی هەنگاوێکی گەورەی ناوە بە پێشکەشکردنی ئۆفەرێکی 90 ملیۆن یۆرۆیی بۆ گواستنەوەی یەکێک لە بەرگریکارە سەرەکییەکانی بارسێلۆنا.
بەگوێرەی پێگەی فیخاچێس، زلهێزەکەی ئینگلتەرا ئەم یاریزانە وەکوو پارچەیەکی سەرەکی بۆ قۆناخی داهاتووی هێڵی بەرگرییان دەبینن، چونکە دەیانەوێت یاریزانێکی هێمن و شارەزا لە یاریکردن بە قاچی چەپ بگوازنەوە، تاوەکوو جێگەی یاریزانانی وەکوو رۆبن دیاز و جۆن ستۆنز پڕ بکاتەوە یان پەستانەکانی سەریان کەم بکاتەوە.
کارگێڕی سیتی بڕوای وایە کە پێشکەشکردنی بڕە پارەیەکی نزیک لە 100 ملیۆن یۆرۆ بۆ یاریزانێکی لاو دەبێتە هۆی ئەوەی بارسێلۆنا ناچار بێت دەست بە دانوستانی جدی بکات، هەرچەندە یانە کاتالوونییەکە بەردەوام جەختی لەوە کردووەتەوە کە ئەم بەرگریکارە ئێستا یەکێکە لە یاریزانە سەرەکییەکانی تیمی یەکەم لەژێر سەرپەرشتی هانزی فلیکدا.
ئەو بەرگریکارەی بارسێلۆنا کە لە چەقی پڕۆژە 90 ملیۆنییەکەی مانچێستەر سیتیدایە، پاو کوبارسییە کە بەرهەمی لاماسیایە و وەکوو کارێکتەرێکی یەکلاکەرەوە لە هێڵی بەرگری بلاوگرانا لەم وەرزەدا دەرکەوتووە. کوبارسی کە ئێستا بووەتە یاریزانێکی جێگیر لە یانەکە و هەڵبژاردەی خوار 21 ساڵانی ئیسپانیا، بەهۆی هێمنییەکەی کاتێک تۆپی لایە و لێهاتوویی لە جێگیربوون لە نێو یاریگا، توانای چوونەنێو یاریزانانی هێڵی ناوەند کاتێک پێویست بێت، سەرنجی هەمووانی راکێشاوە، کە ئەمەش رێک لەگەڵ فەلسەفەی گواردیۆلادا دەگونجێت.
بارسێلۆنا دوودڵە لە رێگەدان بە رۆیشتنی، خوان لاپۆرتا و تیمی تەکنیکی پلانیان هەیە گرێبەستەکەی و مووچەکەی باشتر بکەن، تاوەکوو لە کامپ نوۆ بیهێڵنەوە و بەرگری لەو بەهرەیە بکەن. هەرچەندە رەتکردنەوەی 90 ملیۆن یۆرۆ بۆ یاریزانێکی لاو بڕیارێکی سەختە، ئەگەر مانچێستەر سیتی لە هەفتەکانی داهاتوودا ئۆفەرەکە بەرزتر بکاتەوە، ئەوا رەنگە یاریگای ئیتیحاد ببێتە جێگەی راستەقینەی ئەم ئەڵماسە تەمەن 19 ساڵەی بارسێلۆنا.
