یاریگا –
یانەی لیڤەرپوولی ئینگلیزی بەیاننامەیەكی فەرمی سەبارەت بە خێزانی لویز دیازی كۆڵۆمبی و ئەستێرەی یانەكەیان بڵاوكردەوە.
نووسینگەی داواکاری گشتی کۆڵۆمبیا رایگەیاند، هێزەکانی ئەمنی کۆڵۆمبیا لێکۆڵینەوە لە رووداوی رفاندنی دایك و باوکی یاریزانی تۆپی پێی کۆڵۆمبی و یانەی لیڤەرپوولی ئینگلیزی لویس دیاز لە باكووری وڵاتەكەیان دەکەن.
فابریزیۆ رۆمانۆ لە هەژماری تایبەتی خۆی لە تۆڕی كۆمەڵایەتی ئێكس كە لە رۆژنامەنووسی كۆڵۆمبی ڤیكی داڤێلاوە زانیاریەكانی وەرگرتووە ئاشكرایكرد، ئەمڕۆ دایك و باوكی لویس دیاز ئەستێرەی یانەی لیڤەرپوول لە وڵاتی كۆڵۆمبیا رفێندراون.
Liverpool Football Club can confirm it is aware of an ongoing situation involving the family of Luis Diaz in Colombia.
— Liverpool FC (@LFC) October 29, 2023
سەبارەت بەو رووداوە یانەی لیڤەرپوولی ئینگلیزی بەیاننامەیەكی فەرمی لە هەژماری تایبەتی خۆیان لە پلاتفۆرمی ئێكس بڵاوكردەوە تێیدا هاتووە:
یانەی لیڤەرپوول دووپاتیدەکاتەوە، ئاگاداری دۆخی ئێستای خێزانی لویز دیازە لە کۆڵۆمبیا.
لە دڵەوە هیوادارین کێشەکە بەبێ هیچ زیانێک و لە زووترین کاتدا چارەسەر بکرێت. لە لایەکی دیکەوە، خۆشگوزەرانی یاریزانەکەمان، بە ئامانجی سەرەکیمان دەمێنێتەوە.
وا بڕیارە ئەمڕۆ كاتژمێر 17:00 بە كاتی كوردستان لیڤەرپوول لە یاریگای ئانفیڵدڕۆد میوانداری نۆتینگهام بكات، ئەمەش لە میانی یارییەكانی هەفتەی دەیەمی خولی ئینگلیزیدا.
پێشبینی دەکرێت، بەهۆی ئەو رووداوەوە لویس دیاز بەشداری یارییەکە نەکات.
