یاریگا –
ئەمشەو هەڵبژاردەی فەرەنسا لە یارییەکی دۆستانەدا رووبەڕووی هەڵبژاردەی ئێرلەندای باکوور دەبێتەوە، ئەم یارییەش دەبێتە دەرفەتێکی زێڕین و مێژوویی بۆ کیلیان ئێمباپێ تاوەکوو ناوی خۆی وەکوو گۆڵکاری مێژوویی سەرجەم سەردەمەکانی کەڵەشێرەکان تۆمار بکات.
رێکەوتی 31ـی ئابی ساڵی 2017 بوو کاتێک ئێمباپێ یەکەم گۆڵی خۆی بەرامبەر فەرەنسا کرد، کاتێک وەکوو یەدەک هاتە شوێنی ئۆلیڤیێ جیرۆ ئێستاش دوای تێپەڕینی ساڵانێک، دەیەوێت ریکۆردی دەستکەوتەکانی ئەو یاریزانە کۆتایی پێ بهێنێت.
ژمارەکان قسە دەکەن؛ ئێمباپێ بێڕکابەرە
ئەمشەو ئێمباپێ یاری ژمارە 98ـی خۆی بە درێسی فەرەنساوە دەکات. ئەو لە 97 یاریی رابردوودا توانیویەتی 56 گۆڵ بکات، ئەمەش وای لێدەکات ببێتە کاریگەرترین و لێهاتووترین هێرشبەر لە مێژووی فەرەنسا. تەنیا یەک گۆڵ لە یارییەکەی ئەمشەو لە لیل، ئێمباپێ دەگەیەنێتە هاوشانی جیرۆ، دوو گۆڵیش دەیخاتە لووتکەی گۆڵکاران.
دۆخی فەرەنسا و ئامادەکارییەکانی مۆندیال
ئەم یارییە، کۆتا یاریی فەرەنسایە لەسەر خاکی خۆی پێش ئەوەی رۆژی چوارشەممە بەرەو ویلایەتە یەکگرتووەکانی ئەمریکا بەڕێبکەون بۆ یارییەکانی مۆندیال. فەرەنسا دەیەوێت بەم یارییە ئەو رەخنانە بێدەنگ بکات کە دوای دۆڕانە کتوپڕەکەیان بەرامبەر کۆتدیڤوار 2-1 رووبەڕوویان بووەوە.
سەبارەت بە پێکهاتەکەش، پێشبینی دەکرێت عوسمان دێمبێلی بگەڕێتەوە دوای ئەوەی لە کۆتایی چامپیۆنزلیگ تووشی پێکان هاتبوو. هەروەها دۆخی ویلیام سالیبای بەرگریکاری ئارسیناڵ باشتر بووە و ئەگەری هەیە لە 16ـی حوزەیراندا بەرامبەر سەنیگال بەشدار بێت. لە لایەکی دیکەوە، لێدوانەکەی رەیان شرقی کە رایگەیاندبوو لە مۆندیالدا هەمووان تێکدەشکێنن، کەمێک گرژیی ناوخۆیی دروستکردبوو کە دیشامپ خێرا دۆخەکەی هێورکردەوە.
