چارەسەری دۆناڵد ترەمپ بۆ تووڕەیی هەڵبژاردەی ئێران

یاریگا –

ئێران بەهۆی چەند هۆکارێکەوە کە پەیوەندییان بە تۆپی پێوە نییە، بووەتە یەکێک لە بابەتە سەرەکییەکانی باسی مۆندیال.

ململانێی نێوان ئێران و ویلایەتە یەکگرتووەکانی ئەمریکا، کە یەکێکە لە وڵاتانی میوانداریی پاڵەوانییەتییەکە، لەگەڵ ئەو کۆتوبەندە توندانەی کۆچبەران کە لە لایەن کارگێڕیی ترەمپەوە بەسەر هاوڵاتییانی ئێرانیدا سەپێندراون، لە ئێستاوە کاریگەریی و دەرئەنجامی بۆ ئەم تیمە ئاسیاییە هەبووە.

بۆ دەستپێک، تیمی نیشتمانی ئێران ناچار بوو لە دواساتدا کەمپی راهێنانی سەرەتایی خۆی بگۆڕێت. تیمەکە پلانی دانابوو لە ویلایەتی ئاریزۆنا بمێنێتەوە، بەڵام لەبری ئەوە گواستیانەوە بۆ تیجوانا لە مەکسیک، کە بەیانی زووی رۆژی یەکشەممە گەیشتنە ئەوێ.

دانیشتووانی ناوخۆ و دەسەڵاتدارانی مەکسیک پاڵپشتییەکی بەهێزیان پێشکەش بە ئێران کردووە و پێشوازییان لە تیمەکە کردووە، بەهۆی ئەو ئاستەنگانەی کە لەوانەیە رووبەڕوویان ببێتەوە ئەگەر لە وڵاتی دراوسێدا بمابانەوە. سەرەڕای ئەمەش، هەر سێ یارییەکەی قۆناخی کۆمەڵەکانی ئێران لە ویلایەتە یەکگرتووەکانی ئەمریکا دەکرێن، دووانیان لە لۆس ئەنجلس و دانەیەکیان لە سان فرانسیسکۆ. هێشتا روون نییە کە تیمەکە چۆن و کەی بۆ ئەو یارییانە گەشت دەکات.
دوایین هەواڵەکان ئاماژە بەوە دەکەن کە لەوانەیە ئێران ناچار بکرێت لە هەمان رۆژی هەر یارییەکدا بە فڕۆکە گەشت بکات و راستەوخۆ دوای یارییەکەش وڵاتەکە جێبهێڵێت، ئەمەش بۆ ئەوەی تاوەکوو بکرێت کەمترین کات لەو وڵاتەدا بەسەر ببەن. بێگومان دۆخێکی لەم شێوەیە دەکرێت کاریگەری لەسەر ئاستی وەرزشیی ئێران هەبێت بە بەراورد لەگەڵ تیمە نیشتمانییەکانی دیکەی مۆندیالدا و ئەمەش لەناو جیهانی تۆپی پێدا بە باشی پێشوازی لێنەکراوە. فیفا تاوەکوو ئێستا هیچ لێدوانێکی لەسەر ئەم بابەتە نەداوە.

بۆ خراپترکردنی دۆخەکە، بەگوێرەی هەواڵەکان، رۆژنامەنووسان و هاندەرانی ئێران، هەروەها چەندین وڵاتی دیکەی رۆژهەڵاتی ناوەڕاست و ئەفریقا، رووبەڕووی رەتکردنەوەی ڤیزا بوونەتەوە. تەنانەت بانگەشە دەکرێت ئەو کەسانەش کە مۆڵەتی فەرمی یان بلیتی کڕدراویان هەبووە، رێگەی چوونەنێو ویلایەتە یەکگرتووەکانیان لێگیراوە، ئەمەش رێگری لێکردوون لە ئامادەبوون لە گەورەترین پاڵەوانییەتی تۆپی پێدا.
ئێران تاکە وڵات نییە کە رووبەڕووی کێشە دەبێتەوە، بەڵکوو عێراقیش تووشی ئاستەنگ بووە. ئەگەرچی سەرجەم یاریزانانی عێراق ڤیزایان بۆ بەشداریکردن لە پاڵەوانییەتییەکەدا بەدەستهێنا، بەڵام چەندین ئەندامی شاندەکە ناچار کران بگەڕێنەوە. بۆ نموونە، رێگری لە فۆتۆگرافەری فەرمی تیمی عێراق کراوە بچێتە وڵاتەکە و ناچار بووە بگەڕێتەوە بۆ نیشتمانەکەی.

رووداوێکی تەنانەت مەترسیدارتر پەیوەندی بە ئەستێرەی تیمەکە، ئەیمەن حوسێنەوە هەبوو. ئەیمەن بۆ ماوەی حەوت کاتژمێر لە فڕۆکەخانەی نێودەوڵەتی ئۆهێری شیکاگۆ دەستبەسەر کراوە و لێکۆڵینەوەی لەگەڵدا کراوە، دوای ئەوەی بەهۆی لێکچوونی ناو یان هەڵەیەک لە ناسنامەکەیدا، وەکوو تیرۆریستێک گومانی لێکرابوو.

رووداوی وەکوو ئەمە جۆرە تێڕوانینێکی لای زۆر کەس دروست کردووە کە لە دیدی کارگێڕیی ترەمپدا، وڵاتانی پلە یەک و پلە دوو بوونیان هەیە، سەرەڕای ئەوەی هەمووان لە هەمان پاڵەوانییەتی مۆندیالدا بەشدارن.