یاریگا –
چابی ئاڵۆنسۆ باسی له دۆخی تیپه‌كه‌ی و یاریی به‌رامبه‌ر جیرۆنا كرد و ئاماژه‌ی به‌وه‌كرد تیپه‌كه‌ی له قۆناخی بونیادنانه و كێشه‌یان نییه.
لە کۆنگرەیەکی رۆژنامەوانیدا بەر لە یارییەکەی سبەی بەرامبەر جیرۆنا، چابی ئاڵۆنسۆی راهێنەری یانەی ریاڵ مەدرید باسی لە ئامادەکارییەکانی تیپەکەی، کێشەکانی هێڵی بەرگری،دۆخی ئەستێرەکانی وەک ئارنۆڵد و ڤینیسیۆس کرد.
یارییەکان لە دەرەوەی یاریگا و فشاری خشتەکە
سەبارەت بەوەی ئەمە سێیەم یارییە لەسەریەک لە دەرەوەی یاریگا دەیکەن، راهێنه‌ره ئیسپانیه‌كه گوتی،
“دەزانین کە لە دوای یارییەکەی ئەسینا له چامپیۆنزلیگ دێینەوە، خشتەی یارییەکان زۆر قەرەباڵغە، بەڵام لە خولدا پێویستمان بە بردنەوەیە لە دەرەوەی یاریگا، دەمانەوێت یارییەکی باش و بردنەوەیەکی باش بەدەست بهێنین.”
هێڵی بەرگری و گەڕانەوەی پێکراوەکان
ئاڵۆنسۆ دان بەوەدا دەنێت کە هێشتا تیپەکەی لە رووی بەرگرییەوە کێشەی هەیە،
“ڕاستە ئێمە قۆناخی باشمان بڕیوه، بەڵام پێویستمان بە کۆنتڕۆڵ و بەردەوامیی زیاترە، دڵخۆش نیم بەو گۆڵانەی لەم دواییەدا لێمان کراوە، چونکە هێشتا لە قۆناخی بونیادناندایین.”
سەبارەت بە پێکراوەکان، راهێنەرەکە هەواڵی خۆشی راگەیاند،
“ڕودیگێر و میلیتاو گەڕاونەتەوە، هیوادارین ئەسینسیۆ بانگهێشت بکرێت، بەڵام دین هاوسن هێشتا ئامادە نییە و فرانکۆش بانگهێشت دەکرێت.”
مشتومڕەکان و یەکڕیزیی ژووری جلگۆڕین
سەبارەت بەو دەنگۆیانەی لەسەر یارییەکەی ئێڵچی و ناوبژیوانان دروست بووە، ئاڵۆنسۆ بە کورتی گوتی،
“ئەوانە پەیامی پۆپۆلیستین ، با ئێمە سەرنج بخەینە سەر کارەکەمان کە بردنەوەیە بە شێوازێکی جوان و كاریگه‌ر و وه‌رزشی بێت.”
هەروەها جەختی لەسەر یەکڕیزیی تیپەکەی کردەوە،
“هەمیشە هەستم کردووە تیپەکەم یه‌ك ده‌ست و یەکگرتووە، سەرەڕای ئەوەی لە دەرەوە چی دەوترێت، ئێمە لە ناوەوە زۆر بەهێز و یەکگرتووین و ئامانجمان بردنەوەی هەموو نازناوەکانە.”
ئارنۆڵد، مێندی و دووانەی ڤینی و ئیمباپێ
لە بەشێکی تری قسەکانیدا، ئەلۆنسۆ باسی لە یاریزانەکان کرد:
ئێمه پێویستمان به تڕێنت ئاڵێکساندەر ئارنۆڵده، ، ئەمە ساڵی یەکەمیەتی و ئاساییە کە پێویستی بە کات بێت بۆ خۆگونجاندن، دەبێت پشتیوانی بین.”هه‌روه‌ها فێرلاند مێندی بۆ من جێگای سەرسوڕمان بوو، یەکەم یاری بوو یاری پێ بکەین و ئاستێکی زۆر باش و پارێزراوی پێشکەش کرد.”
له كۆتاییدا له‌باره‌ی ڤینیسیۆس و ئیمباپێ گوتی،
“پەیوەندی و لێکتێگەیشتنی نێوانیان زۆر روونە، بەداخەوەم کە ڤینی نەیتوانی گۆڵ بکات، بەڵام ئەوان زۆر باشن پێکەوە، هیچ كێشه‌یه‌كی نیه، به‌ڵام ئه‌وان دڵته‌نگ ده‌بن كاتێك ناتوانن گۆڵ بكه‌ن و یارمه‌تی تیپه‌كه‌مان بده‌ن.
