سزایەکەی دهۆک و یاریزانەکانی لە خولی ئەستێرەکانی عێراق کەمکرایەوە

یاریگا –

سزایەکەی دهۆک و یاریزانەکانی لە خولی ئەستێرەکانی عێراق کەمکرایەوە و یاریزانەکان لە یارییەکانی داهاتوو دەتوانن بەشداریی بکەن.

زنار زبێر، پارێزەری یانەی دهۆک رایگەیاند :’دوای تانەکەمان لەو سزایانەی بەسەرماندا سەپێنرا، سزایە داراییەکەی سەر یانەکەمان لە 25 ملیۆن دینارەوە بۆ 10 ملیۆن دینار کەمکرایەوە و سەرجەم سزایە دارایی و کارگێڕییەکانی سەر یاریزانەکانمان لابران، یاریزانەکانمان دەتوانن لە یارییەکانی داهاتوو یاریی بکەن’.

بەهۆی رووداوەکانی یاریی هەولێر و دهۆک لە خولی ئەستێرەکانی عێراق، چەندان سزا بەسەر دهۆک سەپێنرا، لێژنەی رێککاری پێش یاریی دهۆک بەرامبەر نەورۆز بڕیاریدا بە سزادانی دهۆک بە ئەنجامدانی یارییەک بەبێ هاندەرانی و پێبژاردنی 25 ملیۆن دینار، کە یاریی دهۆک و نەورۆز بەبێ هاندەران بەڕێوەچوو.

بڕیاریش درابوو بە سڕکردنی هەریەکە لە لوکاس تۆرسی و لۆکاس مۆزێس و مارلۆن سانتۆس بۆ دوو یاری و پێبژاردنی پێنج ملیۆن دینار، هەروەها سڕکردنی جاسم محەمەد حاجی سەرپەرشتیاری تیپی تۆپی پێی یانەی دهۆک بۆ دوو یاری و پێبژاردنی سێ ملیۆن دینار.

لێژنەی رێککاری بڕیاریشی داوە بە پێکهێنانی لێژنەیەک بۆ خەملاندنی زیانەکانی یاریگای فڕانسۆ هەریری بۆ ئەوەی یانەی دهۆک قەرەبووی یانەی هەولێر بکاتەوە.