باشترین یاریزانی ئەم وەرزەی پرێمەرلیگ دیاریکرا

یاریگا –

براوەکانی خەڵاتی باشترین یاریزانی وەرزی 2023/2024ـی پرێمەرلیگ ئاشکراکرا.

کەمێک لەمەوبەر، هەژماری فەرمی پرێمەرلیگ لە پلاتفۆڕمی ئێکس، ناوی براوەی خەڵاتی باشترین یاریزانی ئەم وەرزەی خولەکەی ئاشکراکرد.

فیڵ فۆدنی ئەستێرەی یانەی مانچێستەر سیتی ئینگلیزی خەڵاتی باشترین یاریزانی 2023/2024ـی خولەکەی بەدەستهێنا، کە هەریەکە لە یاریزانان مارتن ئۆدیگارد، ئێرلینگ هالاند، ئالێکساندەر ئیساک، ڤیرجیل ڤان دایک، ئۆلی واتکینس، ديکلان رایس و کۆل پالمەریش بەربژێربوون بۆ بەدەستهێنانی هەمان خەڵات.

فۆدن لەبارەی بەدەستهێنانی خەڵاتەکە دەڵێت؛

بردنەوەی ئەم خەڵاتە دەستکەوتێکی زۆر گەورەیە و شانازی پێوە دەکەم. پرێمەرلیگ بە باشترین خولی جیهان دادەندرێت، بۆیە جێی خۆشحاڵییە ئەم خەڵاتە بە بوونی چەندین یاریزانی گەورەی دیکە بەدەستبهێنم.

بەشێوەیەکی گشتی، زۆر لە ئاستی خۆم لەم وەرزە رازیم و توانیم بە گۆڵ و ئەسیست یارمەتی تیمەکەم بدەم. دەمەوێت سوپاسی ستاف، راهێنەران و یاریزانانی مان سیتی بکەم. بەبێ ئەوان نەمدەتوانی ئەم دەستکەوتە بەدەستبهێنم.

ئەمە پێنجەم وەرزە لەسەریەک یاریزانێکی مانچێستەر سیتی دەبێتە باشترین ساڵ. کێڤن دی بڕۆین لە وەرزەکانی 2019-20 و 2021-22 خەڵاتەکەی بردەوە. لە وەرزی 2020-21 روبن دیاز، بەرگریکاری سیتیزنز باشترینی پرێمەرلیگ بوو و ئێرلینگ هالاندیش لە یەکەم وەرزیدا لە پرێمەرلیگ، وەرزی رابردوو خەڵاتەکەی بردەوە.

فۆدنی تەمەن 23 ساڵان بەرهەمی ئەکادیمیای مانچێستەر سیتییە، لەم وەرزەی پرێمەرلیگیش لە 34 یاری 17 گۆڵی بۆ یانەکەی کردووە و 8 گۆڵیشی درووستکردووە.

Just how good has Phil Foden been in 2023/24? 🤌 pic.twitter.com/oG02RXwevc

— Premier League (@premierleague) May 18, 2024