پرێمەرلیگ خەڵاتی دارایی باشترین شەش یانەکەی زیاد دەکات

یاریگا –

شەش یانە بەهێزەکەی پرێمەرلیگ کە بە تۆپ شەش بەناوبانگن، خەڵاتی دارایی زیاتریان پێدەدرێت.

رۆژنامەی دەیلی تێلێگراف بڵاویکردووەتەوە، پرێمەرلیگ بڕیاریداوە خەڵاتی دارایی شەش یانە گەورەکەی پرێمەرلیگ زیاد بکات، ئەمەش بە مەبەستی زیادکردنی هێزی یانەکان و پرێمەرلیگ.

مانچێستەر سیتی لە وەرزی رابردوودا بڕی 161 ملیۆن پاوەندی قازانج کرد و ساوسامتنی خاوەن دوا پلەی پرێمەرلیگ، بڕی 100 ملیۆن پاوەندی قازانج کرد.

پرێمەرلیگ دەیەوێت خەڵاتی دارایی یانەکان زیاد بکات و سەرنجی زیاتریشی لەسەر شەش یانە گەورەکەیە.

بڕیارە هاوکێشە داراییە نوێیەکە لە وەرزی 2025-2026 جێبەجێ بکرێت، هاوتەریب لەگەڵ بەرزبوونەوەی رێژەی هەڵاوسان لە ئەوروپا.

ئەم بڕیارەی پرێمەرلیگ دەبێ لە ئەنجومەنی یانەکان باس بکرێت و دەنگی لەسەر بدرێت. پاکێجە نوێیەکە 130 ملیۆن پاوەند بۆ خولەکانی خوارەوەی پرێمەرلیگ تەرخان دەکات.

لە هاوینی رابردوودا یانەکانی پرێمەرلیگ 2.26 ملیار پاوەندیان لە بازاڕی گواستنەوەدا خەرج کرد، بە زیادکردنی خەڵاتی دارایی، ئەوا یانەکانی پرێمەرلیگ لە مێرکاتۆدا دەستکراوەتر دەبن.