نهێنییەکی گەورە ئاشکرا دەبێت؛ بۆچی زیدان ئۆفەری گەڕانەوەی بۆ ریال مەدرید رەتکردەوە؟

یاریگا –

مانگی کانوونی یەکەمی رابردوو، پەیوەندییەکی تەلەفۆنی نێوان زینەدین زیدان و فلۆرێنتینۆ پێرێز دەیتوانی مێژووی ئەم دواییە و چارەنووسی ریال مەدرید بە تەواوی بگۆڕێت.

رۆژنامەی ئاس بڵاویکردووەتەوە، کاتێک کارگێڕیی یانەی شاهانە بڕیاریدا چابی ئاڵۆنسۆ لە پۆستەکەی دووربخاتەوە، یەکەم بیرۆکە لای پێرێز گەڕاندنەوەی زیدان بوو، بەڵام بەڵێنێکی پێشوەختە رێگری لەم هەنگاوە کرد.

🚨 JUST IN: Real Madrid made DIRECT CONTACT with Zinedine Zidane in DECEMBER, asking him to replace Xabi Alonso.

But it was too late, as Zidane informed them that his agreement with France NT was SEALED. @jfelixdiaz pic.twitter.com/l3xIDY021G

— Madrid Xtra (@MadridXtra) May 3, 2026

بەگوێرەی زانیارییەکانی رۆژنامە مەدریدییەکە، کارگێڕیی ریال مەدرید پەیوەندی بە زیدانەوە کرد و دەکرا بۆ جاری سێیەم سەرکردایەتی ژووری جلگۆڕینی بێرنابیۆ بگرێتە ئەستۆ، بەڵام راهێنەرە فەرەنسییەکە پێشتر لەگەڵ هەڵبژاردەی فەرەنسا رێککەوتنی واژۆ کردبوو. پابەندبوونی زیدان بەو بەڵێنەی دابووی، وایکرد نەتوانێت بگەڕێتەوە بۆ ڤاڵدیبێباس و لە کۆتاییدا یانەکە ناچار بوو ئەرکەکە بە ئالڤارۆ ئاربێلوا بسپێرێت.

زێدان لە ساڵی 2021ـەوە، دوای کۆتاییهاتنی قۆناخی دووەمی لەگەڵ ریال مەدرید، هیچ پۆستێکی وەرنەگرتووە. سەرەڕای زۆریی ئۆفەرەکان لەم چەند ساڵەی دواییدا، هەمیشە دووپاتی کردووەتەوە کە تەنیا بۆ دوو وێستگە دەگەڕێتەوە سەر کورسیی راهێنەرایەتی؛ ریال مەدرید یان هەڵبژاردەی فەرەنسا. پەیوەندییە باشەکەی لەگەڵ پێرێز و ئامادەبوونی بەردەوامی لە یارییە گرنگەکانی بێرنابیۆ، هەمیشە دەرگای گەڕانەوەی بۆ کراوە هێشتبووەوە.