یاریگا –
دوای ئەوەی راشفۆرد بەرامبەر خیتافی گۆڵی دووەمی کرد و ئەنجامەکەی لە بەرژەوەندی بارسێلۆنا کردە 0-2، لە خولەکی 74 گۆڵپارێزە پۆڵەندییەکە بە زەردەخەنەوە ئاماژەیەکی بۆ راهێنەرەکەی کرد و پێشنیاری کرد کە بچێت بۆ خۆگەرمکردنەوە و لەبری خوان گارسیا بچێتەنێو یاریگا، بەڵام راهێنەرە ئەڵمانییەکە بە جیدی وەڵامی دایەوە و پێی گوت دانیشێت.
لەگەڵ هانسی فلیک، ناتوانیت ئاهەنگی بردنەوەی خول بگێڕیت پێش ئەوەی بە فەرمی بەدەستی بهێنیت. تاوەکوو نازناوەکە لە رووی بیرکارییەوە مسۆگەر نەبێت، جێگەیەک بۆ گاڵتەکردن نییە. دوای بێئومێدی چوونە دەرەوە لە چامپیۆنزلیگ، راهێنەرە ئەڵمانییەکە توانی تیمەکە لە رووی دەروونییەوە بەرز بکاتەوە و دوو بردنەوەی گرنگ بەرامبەر سێڵتا ڤیگۆ و خیتافی بەدەستبهێنێت، ئەمەش بارسا لە نازناوی لالیگا نزیکتر دەکاتەوە.
لە یارییەکەی رۆژی شەممەی رابردوو، کامێراکانی موڤی ستار ساتێکیان بۆ بەرنامەی El Día Después تۆمار کردووە کە دەری دەخات راهێنەری بارسا هێشتا هیچ جۆرە سەرنج بەلاڕێدا بردنێکی ناوێت.
دوای گۆڵەکەی راشفۆرد لە خولەکی 74، چێزنی بە زەردەخەنەوە و بە روونی بە مەبەستی گاڵتە، بە پەنجەی ئاماژەی بۆ هێڵی کەناری یاریگا کرد وەکوو ئەوەی بییەوێت بڵێت “با خۆم گەرم بکەمەوە و لە خولەکەکانی کۆتاییدا بچمەنێو یاریگا”، بەڵام فلیک رووخساری بۆ جیدی گۆڕا و فەرمانی پێکرد لەسەر کورسی یەدەگ دانیشێت.
— 🔟 (@lxmedia10) April 27, 2026
رەنگە ئەمە پلانێکی پێشوەختە بووبێت کە ئەگەر یارییەکە یەکلابووەوە، چێزنی بچێتە شوێنی خوان گارسیا بۆ ئەوەی رێگری بکات لەوەی گارسیا گۆڵێکی کتوپڕی لێتۆمار بکرێت، کە کاریگەری بکاتە سەر کێبڕکێی خەڵاتی زامۆرا کە گارسیا بۆی دەجەنگێت. فلیک پێی وابوو لە ئەنجامی 0-2 نابێت ئەو جۆرە رەفتارە ئارامە نیشان بدرێت.
