دەبێتە بەڕێوەبەری وەرزشی؛ ئێنریکێ ریکێلمی ئەفسانەیەکی ریال مەدرید دەگەڕێنێتەوە

یاریگا –

ئێنریکێ ریکێلمی، بەربژێر بۆ سەرۆکایەتی ریال مەدرید و رکابەری فلۆرێنتینۆ لە کاتی کەمپینی هەڵبژاردنیدا چەند لێدوانێکی بۆ بەرنامەی ئێل لارگێرۆ دا.

سەبارەت بە کەمپینەکە

کەمپینێکی چڕ و سەرنجراکێش بووە و چەندین سوپڕایزی تێدابووە. پێم وایە شتێکی باشە کە ئەندامان بتوانن گوێبیستی پێشنیارە جیاوازەکان بن سەبارەت بە داهاتووی وەرزشی، دارایی و کۆمەڵایەتی یانەکە. سبەی سەردانی چەندین شار دەکەین، لەوانەش کاتالوونیا و سیڤییا.

بۆچی خۆی بەربژێر کرد؟

پێم وابوو ئەگەر داوای هەڵبژاردن بکرێت، بەو مانایەیە کە فلۆرێنتینۆ خۆی بۆ رۆیشتن ئامادە دەکات. هۆکاری سەرەکی کە بڕیارمدا خۆم بەربژێر بکەم، ئەگەری فرۆشتنی یانەکە بوو لە داهاتوودا.

پێی وایە دەتوانێت براوە بێت؟

 بۆ رێگریکردن لە فرۆشتنی یانەکە هاتمە ناو ئەم پێشبڕکێیەوە. پێم وایە پلانی وا هەیە بۆ گۆڕینی پێکهاتەی یانەکە. من دەمەوێت گفتوگۆ لەسەر پڕۆژە وەرزشی و داراییەکان بکرێت، بەڵام فلۆرێنتینۆ نایەوێت دیبەیت بکات.

سەبارەت بە رۆدری

رۆدری یاریزانێکی ناوازەیە و حەز دەکەم لە ریال مەدرید بیبینم. ئەگەر من ببمە سەرۆک، یاریزانێکی وەکوو رۆدری لە ریال مەدرید یاری دەکات. پەیوەندیمان بە نوێنەرەکانییەوە کردووە. لە رۆژانی داهاتوودا ناوێکی دیکە رادەگەیەنین.

سەبارەت بە راهێنەرەکە

پێشتر راهێنەرێکم لە مێشکدا دیاری کردووە، بەڵام دەمەوێت ناوەکان قۆناخ بە قۆناخ ئاشکرا بکەم. چەندین ناو هێنراون، لەوانەش میکێل ئارتێتا، کە راهێنەرێکی مەزنە.

پڕۆژەی وەرزشی

ئەوەی زیاتر منی سەرسام کرد ئەوەیە کە زۆرێک لە ئەندامان پرسیار لەسەر گرێبەستەکان ناکەن. ئەوان باسی ئەو کێشانە دەکەن کە زیاتر لە 20 ساڵە چارەسەر نەکراون. چەندین ئەفسانەی ریال مەدرید پەیوەندی بە کەمپینەکەوە دەکەن.

سەبارەت بە مۆرینیۆ

ئەو راهێنەرێکی مەزنە، بەڵام پێم وانییە لەم کاتەدا ریال مەدرید پێویستی بەو بێت. یانەکە پێویستی بە پڕۆژەیەکی درێژخایەن هەیە کە دەستبەجێ ئەنجام بەدەستبهێنێت.

راوول وەکوو بەڕێوەبەری وەرزشی

پێشتر بەڕێوەبەرێکی وەرزشیم دیاری کردووە و ئیسپانییە. پێکەوە لەگەڵ ئەو و راهێنەرەکەدا گفتوگۆمان لەسەر گواستنەوەکان کردووە. ئەگەر لە هەڵبژاردنەکەدا بیبەمەوە، راوول گۆنزالێز بلانکۆ دەبێتە بەڕێوەبەری وەرزشیی ریال مەدرید. ئەو 16 وەرز لێرە یاریی کردووە و هەمیشە بەرژەوەندی یانەکە دەخاتە پێش هەموو شتێکەوە.

سەبارەت بە فێرناندۆ هیێرۆ

ئەو ئەفسانەیەکی دیکەی ریال مەدریدە. هەموومان حەز دەکەین لەگەڵ کەسێکی وەکوو ئەو کار بکەین، بەڵام دەبێت رێز لەو یانانە بگرین کە ئێستا خەڵکی تێیدا کار دەکەن.

ئێمباپێ و ڤینیسیۆس

ئەوان یاریزانی ریال مەدریدن و هەردووکیان گرێبەستیان لەگەڵ یانەکەدا هەیە.

سەبارەت بە تایبەتکردنی یانەکە

فرۆشتنی یانەکە بە واتای تایبەتکردنی دێت. من نیگەرانم سەبارەت بە دۆخی دارایی و هەوڵدان بۆ سوپەرلیگ. ریال مەدرید هی ئەندامەکانیەتی، ئەی بۆچی بفرۆشرێت؟

کەمکردنەوەی نرخی بلیتەکانی وەرز

یەکێک لە پێشنیارەکانم کەمکردنەوەی تێچووی بلیتەکانی وەرزە بە رێژەی 50%. هەندێک کەس ساڵانێک چاوەڕێی بلیت دەکەن لە کاتێکدا کەسانی دیکە زۆر خێراتر بەدەستی دەهێنن.

تۆپی پێی خانمان

توانای لەخۆگرتنی هاندەرانی یاریگای تیمی خانمان زیاد دەکەم و یارییە گەورەکان دەکرێت لە بێرنابیۆدا ئەنجام بدرێن.

بۆچی مۆدێلی ئێستا بگۆڕدرێت؟

ریال مەدرید زیاتر لە 1.7 ملیار یۆرۆ قەرزی پەیوەندیداری بە یاریگاوە لەسەرە. یانەکە داهاتی زۆرە، بەڵام خەرجییەکەشی زۆرە. هێشتا کەمکردنەوەی قەرزەکە دەستی پێ نەکردووە.

سەبارەت بە لەپێشبوونی هەڵمەتەکەی فلۆرێنتینۆ

کاتێک داوای دەستڕاگەیشتنم بە لیستی ئەندامان کرد بۆ پێشکەشکردنی کەمپینەکەم، پێم گوترا بەهۆی پاراستنی داتاکانەوە ئەوە ئەستەمە. کەچی تەواوی ئەندامان زانیارییەکانی دەنگدانی فلۆرێنتینۆیان پێگەیشت.

نوێکردنەوەی گرێبەستی ڤینیسیۆس

من نازانم ئایا ئەو گرێبەستەکەی نوێ کردووەتەوە یان نا. شتێکی گرنگ کە پێویستە هەبێت پلەبەندییەکی روونە لەنێو یانەکەدا بۆ ئەوەی هەموو کێشەیەک نەگاتە سەر مێزی سەرۆک.

دیدگای ئەو بۆ ریال مەدرید

من ریال مەدریدێکم دەوێت کە دەستبەجێ نازناوەکان بباتەوە، کە تێیدا یاریزانان و هاندەران شانازی بە یانەکەیانەوە بکەن. هەندێک لەو بەهایانە ون بوون و هەر لەبەر ئەوەشە گۆڕانکاری پێویستە.

بۆچی راوول وەکوو راهێنەر نا؟

پێشتر دەرفەتی پێنەدراوە، بەڵام پێم وایە وەکوو بەڕێوەبەری وەرزشی دەتوانێت هاوکاری زیاتر پێشکەش بکات. راهێنەر دەبێت کەسێک بێت کە خاوەن ئەزموونێکی بەرچاو بێت.

سەبارەت بە خولی یەکەمی جۆزێ مۆرینیۆ لە مەدرید

من هاندەری مەدریدم، نەوەکوو هاندەری جۆزێ مۆرینیۆ. لە ماوەی کارکردنی لە یانەکەدا هەندێک شت هەبوون کە من هەستم پێی بە ئاسوودەیی نەکرد.

سەبارەت بە گەرەنتی بانک

ئەو بانکەی کە پاڵپشتی بەربژێربوونی من دەکات ئیسپانییە، وەکوو ئەوەی لە یاساکانی یانەکەدا داواکراوە. هەموو رۆژێک دەنگۆ و چیرۆکی درۆ هەن. من پێم باشە سەرنج بخەمە سەر روونکردنەوەی بیرۆکەکانم.

سەبارەت بە رامۆن کالدێرۆن

لەو قۆناخەدا تەنیا 15 ساڵ تەمەنم بوو. من 700 ملیۆن یۆرۆ لە پارەی خۆم بۆ گەرەنتییەکە داناوە. بۆ ئەوە لێرە نیم دەوڵەمەندتر بم؛ پێش ئەوەی بێمە ناو ئەم پێشبڕکێیەوە بازرگانیی خۆمم بنیاد ناوە.

سەبارەت بە دۆسیەی نیگرێیرا

ئەمە بە لای منەوە باوڕپێنەکراوە. ریال مەدرید دەبوو بە توندی و زووتر سەبارەت بە دۆسیەی نیگرێیرا کاردانەوەی هەبووایە.

هاندەران چی پێ دەڵێن؟

ئەوان سوپاسم دەکەن کە دەنگم بەخشیوەتە ئەندامان و گوێم لە نیگەرانییەکانیان گرتووە.

ئەگەر بدۆڕێت

من تەنیا سەرنجم لەسەر 7ـی حوزەیرانە. هانی هەموو ئەندامان دەدەم کە دەنگ بدەن دوای 20 ساڵ بەبێ هەبوونی کێبڕکێیەکی راستەقینەی هەڵبژاردن. ئەمە دەکرێت دوا هەڵبژاردن بێت کە ریال مەدرید لە مێژووی خۆیدا بیبینێت.