یاریگا –
گۆڵی هێرشبەرەکەی بارسێلۆنا بەرامبەر سێڵتا ڤیگۆ کە بەهۆی ئۆفسایدێکی زۆر کەمەوە رەتکرایەوە، بەڵام ئەوەی دوای تۆمارکردنی گۆڵەکە ئەنجامیدا، بووە دیارترین ساتی یارییەکە.
فێران تۆرێس دوای ئەوەی تۆڕی گۆڵی هەژاند، بەرەو کامێراکان چوو و درێسەکەی بەرزکردەوە بۆ نیشاندانی پەیامێکی دەستنووس کە پێشکەشی کردبوو بە ماریا کامانیۆ؛ ئەو کچە تەمەن 13 ساڵەی کە بە “شازادە جەنگاوە ئاشقەکەی تۆپی پێ” دەناسرا و بەم دواییانە دوای ململانێیەکی سەخت لەگەڵ نەخۆشی شێرپەنجە، کۆچی دوایی کرد.
فێران پەیوەندییەکی نزیکی لەگەڵ ماریا هەبوو دوای ئەوەی لە کاتی گەشتێکی تیمەکەدا بۆ شاری سالامانکا ناسیبووی، هەر بۆیە یەکەم کاردانەوەی دوای گۆڵەکە بریتی بوو لە رێزگرتن لە یادی ئەو کچە. ئەمەش ئەو ساتەی بۆ ستایشێکی کاریگەر گۆڕی. تۆرێس لە پەیامەکەیدا نووسیبووی: “رووناکی تۆ بۆ هەمیشە بەردەوام لەگەڵ ئێمە دەدرەوشێتەوە، رۆحت شاد بێت، ماریا.”
هەرچەندە گۆڵەکە هەژمار نەکرا، بەڵام ئەم ئاماژە مرۆییەی فێران بە خێرایی لە تۆڕە کۆمەڵایەتییەکاندا بڵاوبووەوە و دەنگدانەوەیەکی گەورەی لە دەرەوەی یاریگاش دروستکرد، وەکوو هێمایەکی هاوسۆزی و بیرەوەریی ئەو کچە مایەوە.
