یاریگا –
لە پێشهاتێکی نوێدا و بەهۆی تێکچوونی بارودۆخی ئەمنی و سیاسیی ناوچەکە، یەکێتیی تۆپی پێی کەنداو بڕیاریدا یاریی نێوان یانەی زاخۆی نوێنەری عێراق و یانەی شەبابی سعوودی بۆ کاتێکی نادیار دوابخات.
هۆکاری دواخستنەکە: سێبەری جەنگ بەسەر وەرزشەوە
بڕیار بوو سێشەممە، لە یاریی چوونی قۆناخی پێش کۆتایی خولی یانە پاڵەوانەکانی کەنداو، زاخۆ لە ناو خاکی سعوودیە ببێتە میوانی یانەی شەباب. بەڵام بەهۆی پەرەسەندنی گرژییە سەربازییەکانی نێوان ئێران و ئەمریکا و مەترسییەکانی سەر گەشتە ئاسمانییەکان لە ناوچەکەدا، بڕیاری دواخستنی یارییەکە وەک رێکارێکی پارێزگاری لە سەلامەتیی شاندی هەردوو یانە درا.
زاخۆ لە سعوودیەیە و یارییەکە ناچێتە ڕێوە
سەرچاوەیەکی تایبەت لە یانەی زاخۆوە بە تۆڕی وەرزشی یاریگا”ی ڕاگەیاند،
بەفەرمی ئاگادارکراوینەوە کە یارییەکە بۆ کاتێکی نادیار دواخراوە.
ئەم بڕیارە لە کاتێکدایە کە شاندی یانەی زاخۆ دوو ڕۆژ لەمەوبەر بە ئومێدێکی زۆرەوە گەشتی سعوودیەیان کردبوو و لە کەمپێکی مەشق و ڕاهێناندا بوون بۆ ئامادەکاریی ئەم یارییە مێژووییە، بەڵام ئێستا دەبێت چاوەڕێی بڕیاری نوێی یەکێتییەکە بن بۆ دیاریکردنی چارەنووسی یارییەکە.
گرنگیی یارییەکە بۆ زاخۆ
گەیشتنی یانەی زاخۆ بۆ قۆناخی پێش کۆتایی جامی یانەکانی کەنداو، دەستکەوتێکی بێوێنەیە لە مێژووی یانەکە و تۆپی پێی کوردستاندا. هاندەرانی زاخۆ بە پەرۆشەوە چاوەڕێی ئەم یارییە بوون تاوەکو ببینن تیپەکەیان لە بەرامبەر یەکێک لە زەبەلاحەکانی سعوودیە چۆن دەردەکەوێت، بەڵام دۆخی ناوچەکە رێڕەوی رووداوەکانی گۆڕی.
چارەنووسی پاڵەوانێتییەکە چی لێدێت؟
تەنها یاریی زاخۆ و شەباب نییە کە کەوتووەتە ژێر کاریگەریی ئەم گرژییانە، بەڵکو تەواوی چالاکییە وەرزشییەکانی ناوچەکە پەککەوتوون. پێشبینی دەکرێت لە چەند رۆژی داهاتوودا، ئەگەر بارودۆخەکە هێور نەبێتەوە، یارییەکە بگوازرێتەوە بۆ وڵاتێکی بێلایەن یان بۆ کاتێکی دوورتر دوابخرێت.
