یاریگا –
پێکانەکەی ئالێکساندەر ئیزاک، هاوکێشەی هێڵی هێرشبەری سلۆت دەگۆڕێت و پێگەی سەڵاح لە لیڤەرپوول بەهێزتر دەکات.
پێکانە سەختەکەی ئالێکساندەر ئیزاک کێشەیەکی دیکەی بۆ وەرزە پڕ لە هەوراز و نشێوییەکەی لیڤەرپوول زیاد کرد، بەڵام لە هەمان کاتدا کاریگەری سەرەکی لەسەر داهاتووی هێرشبەرە میسڕییەکە درووست دەکات و هەروەها پلانەکانی تیپەکە لە بازاڕی گواستنەوەی زستانەی داهاتوودا بەرفراوانتر دەکات.
پێکانی ئیزاک لە دوایین یاریی لیڤەرپوول بەرامبەر تۆتنهام هاوسەنگی هێڵی هێرشبەری سلۆت تێکدەدات و گفتوگۆکان لە دەوری پرسیارە گرنگەکان چڕتر دەکاتەوە، سەرەکیترینیان ئەمەیە: ئارنە سلۆت چۆن هێڵی هێرشبەری خۆی تا کۆتایی وەرز رێک دەخات؟
سلۆت هەرگیز بە خەیاڵیدا نەدەهات سەرەتای وەرزی یەکەمی ئیزاک لە ئانفیڵد بەم شێوەیە بێت. ئامارەکانی هێرشبەرە سویدییەکە سەرنجڕاکێش نین (3 گۆڵ لە 16 یاریدا لە هەموو پاڵەوانێتییەکان و تەنیا 2 گۆڵ لە پرێمەرلیگ لە دوای پەیوەندی کردنی بە لیڤەرپوولەوە)، بەڵام سەرەڕای ئەوەش هاتنی هێمای پڕۆژەیەکی نوێی هێرشبەری بوو.
پێکانی ئیزاک پلانەکانی سلۆت دەگۆڕێت
لیڤەرپوول لە سەرەتای وەرزەوە رووبەڕووی چەندین ئاستەنگ بووەتەوە و لەگەڵ نزیکبوونەوەی گواستنەوەی زستانە، پلانی نەگوتراو بەڵام روون ئەوە بوو، یەکەم: بەهێزکردنی هێڵی بەرگری، بەتایبەتی هەوڵدان بۆ گواستنەوەی مارک گێی لە کریستاڵ پاڵاس.
ئێستا کە بە ئەگەرێکی زۆرەوە ئیزاک بۆ چەند مانگێک لە یاریگاکان دووردەکەوێتەوە و کۆدی خاکپۆ پێکانی هەیە و محەمەد سەڵاحیش لە جامی نەتەوەکانی ئەفریقا بەشداری کردووە، پێویستە یانەکە هەوڵی بەهێزکردنی هێڵی هێرشبەری بدات کە ئاستەنگی بژاردەی هێرشبەری هەڕەشە لە مانەوەی تیپەکە لە سێ پاڵەوانەیەتی جیاوازدا دەکات.
سەڵاح، کەیسێکی ئاڵۆزتر
پێکانەکەی ئیزاک بەو مانایەیە کە سلۆت ناتوانێت بژاردەی هێرشبەری کەم بکاتەوە؛ بۆیە سەڵاح لە گواستنەوەی زستانەدا بۆ فرۆشتن نییە. بە واتایەکی دیکە، تەنانەت ئەگەر پرسیار لەسەر دابەزینی ئاستی سەڵاح لە هەندێک لایەندا هەبێت (وەک توانای بڕین و گۆڵکردن بە بەراورد بە رابردوو) و تەنانەت ئەگەر چاوپێکەوتنە مشتومڕاوییەکەی جەنجاڵییەکی لەسەر داهاتووی دروست کردبێت، ئەوا نەبوونی ئیزاک مانەوەی سەڵاح لە یانەکە پشتڕاست دەکاتەوە، بە تایبەت کە شوێنگرەوەکانی بەردەست ئێستا یان پێویستیان بە کات هەیە، یان ئەزموونیان کەمترە، یان متمانەی تەواوی راهێنەریان بەدەستنەهێناوە.
گەشتەکەی سەڵاح بۆ مەغریب بۆ ئەوەی لە جامی نەتەوەکانی ئەفریقا بەشداری بکات، دەکرێت دەرفەتێکی گونجاو بێت بۆ دووبارە بنیاتنانەوە باری دەروونی لە کەشێکی ئارامتر و فشاری کەمتر، بەتایبەت ئەگەر بتوانێت باشترین ئاستی خۆی لەگەڵ هەڵبژاردەی ولاتەکەیدا بدۆزێتەوە.
لە نەبوونی ئیزاکدا باشترین بژاردە بۆ راهینەرە هۆڵەندییەکە سەڵاحە و سەڵاحیش دەبێت لە کاتی گەڕانەوەی بەهای خۆی بسەلمێنێت و کۆتایی بە ناکۆکییەکانی لەگەڵ راهێنەرەکەی بهێنێت.
