یاریگا –
کێڤن پرینس بۆواتینگ، ئەستێرەی گانا بۆ یەکەمجار نهێنی گواستنەوەی بۆ بارسێلۆنا ئاشکرا دەکات.
بۆواتینگ وەکو یەکێک لە ئەستێرە لاوەکانی ئەوکاتە، لە یەنایەر/کانوونی دووەمی ساڵی 2019 بەخواستن لە یانەی ساسۆلۆوی ئیتاڵییەوە پەیوەندی بە بارسێلۆنا کرد.
بۆواتینگ بەشداری لە پۆدکاستی ئەنسکریپتد ‘UNSCRIPTED’ی جۆش مەنسووڕ کرد و تیایدا باسی لە رۆڵی باڵای لیۆنێل مێسی لە گواستنەوەکانی بارسێلۆنادا کرد؛
ئێریک ئابیدال، بەڕێوەبەری وەرزشی منی خۆشدەویست، سەرۆک و راهێنەر منیان بەدڵ بوو، منیش گوتم، با گرێبەستەکە واژۆ بکەین، پێیانگوتم، پێویستە سەرەتا پرسیار لە مێسی بکەین.
مێسی زۆر بە دەسەڵات بوو، ئەگەر مێسی رەزامەندی نەدابا، ئەوا هەرگیز یاریم بۆ بارسێلۆنا نەدەکرد.
ئەو شەوە خەوتم و هەموو هیوام لەسەر رەزامەندی مێسی دانابوو، چونکە بەبێ رەزامەندی مێسی، لە توانامدا نەبوو یاریی بۆ بارسا بکەم.
بارسێلۆنا توانای گواستنەوەی هەمیشەیی بۆواتینگی لە ساسۆلۆو بەبڕی تەنیا هەشت ملیۆن یۆرۆ هەبوو، بەڵام مەرجەکە چالاک نەکرا و دوای شەش مانگ گەڕایەوە ئیتاڵیا.
بۆواتینگ تەنیا بەشداری لە چوار یاریی لالیگادا کرد و کۆی بەشدارییەکەی بریتیبوو لە 303 خوولەک، بەبێ ئەوەی هیچ گۆڵێک بکات.
بۆواتینگ یەکێکە لەو یاریزانانەی یارییان بۆ زیاتر لە 10 یانە کردووە و بە یاریزانێکی گەڕۆک وەسف دەکرا.
ئەستێرە گانییەکە یاریی بۆ چەندین یانەی دیاریی ئەوروپای وەکو؛ بۆڕووسیا دۆرتموند، تۆتنهام، جێنوا، میلان، شالکێ، بێشیکتاش، مۆنزا و هێرتا بێرلین کردووە.
