سێ یاریزانی سەرەکی دۆرتمۆند لە یارییەکەی بەرامبەر بارسێلۆنا ئامادە نابن

یاریگا –

دۆرتمۆند بۆ یارییەکەی بەرامبەر بارسێلۆنا لە قۆناخی چارەکی پێش کۆتایی لە توانای سێ یاریزانی یەکلاکەرەوەی خۆی بێبەش دەبێت.

بروسیا دۆرتمۆند بە بردنەوەیەکی یەکلاکەرەوە لە فرایبۆرگ بە ئەنجامی 4-1 ئاستی جارانی گەرایەوە، بەڵام یانە ئەڵمانیەکە بێ سێ یاریزانی گرنگەوە گەشت بۆ کەتەلۆنیا دەکات کە نیکۆ کۆڤاچی راهێنەری دۆرتمۆند ناچار دەکات بەدوای شوێنگرەوەیەک بۆ ئەستێرەکانی لە پێکهاتەی سەرەکیدا بگەڕێت تاوەکوو رووبەرووی زریانەکەی هانسی فلیک ببێتەوە.

نیکلاس سولێ و مارسێل سابیتزە پێکانیان هەیە و پێشبینی دەکرێت بەشداری یارییەکە نەکەن، پاسکال گڕۆس بەهۆی کەلەکەبوونی کارتەکانیەوە، بۆ یەک یاری لە چامپیۆنزلیگ سزادراوە.

سەرەڕای بەشدارینەکردنی ئەم یاریزانانە، نیکۆ کۆڤاچ هێشتا دەرفەتی ئەوەی هەیە پێکهاتەیەکی تۆکمە بەرامبەر بارسا یاری پێبکات. نیکۆ شلۆتێربێکی بەرگریکار دەگەڕێتەوە پێکهاتەی سەرەکی. لە هێڵی ناوەڕاستیش کارنی چوکویمێکا و فیلیکس نێمچا و ساڵح ئۆزجان رکابەری لەسەر دوو پۆستی ناوەڕاستی هێڵی ناوەڕاست دەکەن.

بروسیا دۆرتمۆند دوای دوو سەرکەوتنی لەسەریەک لە بۆندسلیگا بە ورەیەکی بەرزەوە بەرامبەر بارسێلۆنا دەچێتە نێو یاریگا و هیوادارن لە مۆنتجویک ئاستەنگ بۆ تیپەکەی هانسی فلیک درووست بکەن و بۆ یاریی گەڕانەوە لە یاریگای خۆیان رێگەی گەیشتن بە پێشکۆتایی ئاسانتر بکەن.