ئارسیناڵ لە ترسی ریال مەدرید و نەسڕ کەوتووەتە دۆخی ئامادەباشییەوە

یاریگا –

ئارسیناڵ ترسی لە لەدەستدانی چەند ئەستێرەیەکی هەیە و لە ئێستاوە کار لەسەر نوێکردنەوەی گرێبەستی بەشێکیان دەکات.

پێگەی Sportkeeda روونیکردووەتەوە، بەرپرسانی ئارسیناڵ خەریکن کار لەسەر نوێکردنەوەی گرێبەستی سێ یاریزانی سەرەکی تیمەکەیان دەکەن، ئەمەش بەهۆی گرنگیپێدانیانەوە لەلایەن یانەکانی سعوودیە.

یانەکەی باکووری لەندەن دەیەوێت گرێبەستی گابریێل ماگالیش، ویلیام سالیبا و بوکایۆ ساکا بەزووترین کات نوێبکاتەوە، چونکە گرێبەستی هەرسێ یاریزانەکە لە هاوینی ساڵی 2027 بەسەردەچێت.

لەماوەی رابردوودا، نەسڕ بە توندی چووبووە نێو کێبڕکێکانی بەدەستهێنانی واژۆی گابریێل، تەنانەت ئۆفەرێکی گەورەشی بۆ ئامادەکردووە.

نەسڕ ئامادەیە مووچەی ساڵانەی گابریێل بکاتە 20 ملیۆن یۆرۆ، ئەمەش سێ ئەوەندەی مووچەی ئێستایەتی، بۆیە ئارسیناڵ کەوتووەتە خۆی و لە ترسی سعوودییەکان، مووچەی بەشێک لە یاریزانەکانی بەرزدەکاتەوە.

جیا لە یانەکانی سعوودیە، ریال مەدریدیش بیر لە گواستنەوەی سالیبای فەڕەنسی دەکاتەوە و یەکێکە لە بژاردەکان بۆ چارەسەرکردنی کێشەکانی هێڵی بەرگری.