شوڕتە یاریی لووتکەی بردەوە بەڵام بە دۆڕاو بۆی هەژمار دەکرێت

یاریگا –

وێڕای سەرکەوتنی لە یاریی لووتکەی ئەم گەڕەی خولی ئەستێرەکانی عێراق، شوڕتە بەدۆڕاو هەژمار دەکرێت بەرامبەر قوەجەوییە.

لە یاریی لووتکەی گەڕی 17ـەی خولی ئەستێرەکانی عێراق، شوڕتە بە ئەنجامی 2 _ 1 لە قوەجەوییەی بردەوە، وێڕای سەرکەوتنیان شوڕتە بە دۆڕاو هەژمار دەکرێت بەهۆی ئەوەی سێ یاریزانی پیشەگەر کە هەڵبژاردەکانیان لە سەرووی ریزبەندی 90ـی جیهانی دێت بەشدارییان لە یارییەکە کردووە، هەر یەک لە مەحمود مەواسی سووری و عەبدولمەجید ئەبوبەکری نایجەری و بەشداری پێکردنی فەهد یوسفی سووری لە دواخولەکەکانی یاریی هۆکاری ئەم هەڵە کارگێڕیەن.

لە رێنمایی یەکێتی تۆپی پێی عێراقدا هاتووە کە هەر یانەیەک شەش یاریزانی پیشەگەر یاریی بۆدەکات، دەبێت چوار یاریزان ریزبەندی هەڵبژاردەکانیان لە خوارووی ریزبەندی 90ـی جیهانی بێت و دوو یاریزانیش ئاساییە هەڵبژاردەکانیان لە سەرووی ریزبەندی 90ـی جیهان بێت، بەڵام لە 10 خولەکی کۆتایی سێ یاریزانی شوڕتە کە هەڵبژاردەکانیان لە سەرووی 90ـی جیهانیە لە نێو یاریگادابوون، هەڵبژاردەی سووریا لە ریزبەندی 95ـە و هەڵبژاردەی نایجەریش لە ریزبەندی 122ـی جیهان دێت، بەم هۆیەشەوە قوەجەوییە دەیانەوێت پەڵپ بگرن و یارییەکەشیان 3 _ 0 بۆ هەژمار دەکرێت.

ئێستا بەم سەرکەوتنه شوڕتە کۆی خاڵەکانی بووە 34 خاڵ و لە ریزبەندی دووەم دێت، قوەجەوییە بە 28 خاڵ لە ریزبەندی حەفتەم مایەوە.