دادگایی دەکرێت؛ فێرلاند مێندی بە تۆمەتی هۆکاری برینداربوونی نەوجەوانێک تۆمەتبار دەکرێت

یاریگا –

ئەم رووداوە لە کانوونی دووەمی 2023 رووی داوە و فێرلاند مێندی بە هۆکاری برینداریی جەستەیی سەخت تۆمەتبارە.

دادگایەک لە ئەلکۆبێنداس (مەدرید) رێکارەکانی دادگاییکردنی دژی فێرلان مێندی، یاریزانی یانەی ریال مەدرید دەست پێ کرد. ناوبراو تۆمەتبارە بە هۆکاربوون لە برینداریی جەستەیی، ئەمەش دوای ئەوەی چوار سەگی لە موڵکەکەی هەڵاتوون و یەکێکیان هێرشی کردووەتە سەر دوو سەگی دیکە و مێردمنداڵێکی 17 ساڵانیشی لە کانوونی دووەمی 2023 بریندار کردووە.

مێندی بە تاوانی بریندارکردنی جەستەیی سووک تۆمەتبار کراوە، کە تێیدا داواکاری گشتی داوای سزای پێبژاردنی دارایی بە بڕی 1,200 یۆرۆ دەکات. لە بەرامبەردا، لایەنی سکاڵاکار کە نوێنەرایەتی مێردمنداڵە بریندارەکە دەکات، کە قاچی چەپی گازی لێگیراوە و لەلایەن کۆمپانیای یاسایی “99 Abogados”ـەوە نوێنەرایەتی دەکرێت، داوای شەش مانگ زیندانیکردن بۆ یاریزانەکە دەکات بە تۆمەتی بریندارکردنی جەستەیی بەهۆی کەمتەرخەمییەکی گەورەوە.

دادوەرێکی لێکۆڵینەوە لە ئەلکۆبێنداس، ئەو شارەوانییەی مەدرید کە رووداوەکەی تێدا روویداوە، لە 7ـی کانوونی دووەمدا بڕیارێکی بۆ دەستپێکردنی رێکارەکانی دادگاییکردن دەرکرد، ئەمەش بەپێی ئەو بەڵگەنامانەی کە دەست ئاژانسی EFE کەوتوون. دادوەرەکە فەرمانیشی بەو یاریزانە کردووە کە بڕی 7,410 یۆرۆ وەکوو بارمتە دابنێت تاوەکوو تێچووی داواکارییەکانی قەرەبووکردنەوە جیاوازەکان بگرێتەوە. سەرچاوە یاساییەکان بە EFEـیان راگەیاندووە کە کەیسەکە لە دادگای تاوانەکانی ژمارە 26ـی مەدرید دەبینرێت، هەرچەندە هێشتا وادەیەک بۆ دادگاییکردنەکە دیاری نەکراوە.

ئەو رووداوانەی لێکۆڵینەوەیان لەسەر دەکرێت، مێژووەکەیان بۆ 4ـی کانوونی دووەمی 2023 دەگەڕێتەوە، کاتێک چوار سەگی بەرگریکارەکەی ریال مەدرید لە حەوشەی ماڵەکەیەوە لە شەقامێکی نیشتەجێبوونی تایبەت لە ئەلکۆبێنداس هەڵاتن. بەپێی ئەنجامگیرییە سەرەتاییەکانی داواکاری گشتی، یەکێک لەوان نزیکی ئافرەتێک و سەگەکەی بووەتەوە و لە پشتی سەگەکەی داوە، ئەمەش بووەتە هۆی بریندارییەک کە دواتر ناچار بوون بێهۆشی بکەن تاوەکوو بمرێت.

مێردمنداڵێکی 17 ساڵان بۆ یارمەتیدانی ئافرەتەکە چووەتە پێشەوە و لە قاچی چەپیدا گازی لێدراوە. ئەو سەگەی دیکەش کە مێردمنداڵەکە پیاسەی پێ دەکرد، لە مل و سنگی تووشی برینداری بووە و پێویستی بە نەشتەرگەریی بووە. بەپێی راپۆرتی داواکاری گشتی، ئەو چوار سەگەی لە ماڵی یاریزانەکە هەڵاتوون، کە دووانیان لە جۆری ماستیف، دانەیەکیان کانگاڵی تورکی و دانەیەکی دیکەیان دۆگۆ بووەم چاودێریی ئەلیکترۆنی (مایکرۆچیپ)، دڵنیایی ناچاری و کوتانی دژە هارییان نەبووە.

داواکاری گشتی پێی وایە مێندی پەیڕەوی ئەرکی پێویستی چاودێریکردن و پاراستنی نەکردووە بەرامبەر بەو سەگە گەورانە، ئەمەش بەهۆی نەگرتنەبەری ئەو رێوشوێنانەی کە لە کەسێکی هۆشیار چاوەڕوان دەکرێت، تاوەکوو دڵنیا بێت لەوەی دەروازەی ماڵەکەی دوای چوونە ناوەوەی ئۆتۆمبێلێک بە تەواوی داخراوە.

لە ئەنجامی ئەمەشدا، سەگەکان هەڵاتوون و بۆ ماوەیەکی نادیار بەبێ چاودێری یان کۆنترۆڵ لەسەر شەقامەکە ماونەتەوە، بەمەش مەترسییەکی راستەقیینەیان بۆ سەر خەڵک و ئاژەڵەکانی دیکە دروست کردووە.

بۆ ئەو تاوانانەی ئاڕاستەی کراون، داواکاری گشتی داوای قەرەبووی 450 یۆرۆ بۆ خاوەنی ئەو سەگەی دواتر مرد، 4,970 یۆرۆ بۆ ئەو مێردمنداڵە بریندارە بەهۆی ئەو برین و شوێنەوارە هەمیشەییانەی لەسەر جەستەی ماونەتەوە و 240 یۆرۆ بۆ خاوەنی سەگی دووەمی بریندارەکە دەکات تاوەکوو تێچووی پزیشکی ئاژەڵان دابین بکات. لایەنی سکاڵاکاری تایبەتیش داوای قەرەبووی زۆر زیاتر دەکات؛ ئەوان داوای 20,000 یۆرۆ بۆ مێردمنداڵە بریندارەکە و 2,500 یۆرۆ بۆ خاوەنی سەگی دووەم دەکەن.