چاوەڕواننەکراو؛ سەعید بن رەحمە لە گواستنەوەیەکی شۆکهێنەر نزیکە

یاریگا –

سەعید بن رەحمە لەگەڵ یانەیەکی چاوەڕواننەکراو لە گفتوگۆدایە و وێستگەی داهاتووی خۆی دەخاتە دەرەوەی ئەوروپا.

بەگوێرەی زانیارییەکانی footmercato، هێرشبەرە جەزائیریەکە لەگەڵ یانەی نیۆمی سعودی لە گفتوگۆدایە تا پێش داخستنی بازاڕی زستانە لیۆنی فەڕەنسی جێبهێڵێت و رووبکاتە یانەکەی کەنداو.

ئەوەی چاوەڕواننەکراوە، ئەو یانەی بن رەحمە پەیوەندیی پێوەدەکات لە خولی پلە یەکی سعودیە بەشدارە نەک خولی رۆشەن.

سەعید کە لەنێوان 2021-2024 درێسی یانەی وێستهامی ئینگلیزی پۆشی، زستانی ساڵی پار بەخواستن روویکردە لیۆن. دواتر و لە هاوینی هەمان ساڵ گواستنەوەکەی کرا بە هەمیشەیی بە بڕی 12.3 ملیۆن پاوەند.

خواستی رۆشتنی سەعید لە لیۆن کەئێستا ریزبەندی چوارەمی خولی فەڕەنسیە، بەشێکی زۆری بە ویستی یانەکەیە. ئەوەش بەهۆی مەترسی لە دابەزینیان بۆ خولی خوارتر لەبەر خراپی بەڕێوەبردنی دارایی لەلایەن کارگێڕیی لیۆنەوە.

بۆ زانین، ئەو یانەیە تا ئێستا هەر لەم زستانەدا سێ یاریزانی دیکەی بەهەمان هۆکاری سەرەوە فرۆشتووە.