تایبەت بە یاریگا؛ لەسەر شوێنی یاریکردنی ناکۆکی کەوتووەتە نێوان عەلی شاخەوان و لوئەی سەڵاح

یاریگا –

عەلی شاخەوان لەگەڵ لوئەی سەڵاح لەسەر شوێنی یاریکردنی ناکۆکە، بەمزووانە چارەنووسی عەلی شاخەوان لە قوە جەوییە یەکلا دەبێتەوە.

تۆڕی وەرزشی یاریگا زانیویەتی، پەیوەندیی نێوان عەلی شاخەوان و لوئەی سەڵاح ساردی تێکەوتووە، راهێنەرەکەی قوە جەوییە داوا دەکات عەلی شاخەوان لە هێلی بەرگری لای راست یاریی بکات، بەڵام ناوەڕاستکارەکەی پێشووی هەولێر ناڕازییە و سوورە لەسەر ئەوەی لە ناوەڕاست یاریی بکات و بەڵێنی پێشکەشکردنی ئاستێکی بەرز لە هێلی ناوەڕاست دەدات.

بەگوێرەی سەرچاوەیەک بۆ تۆڕی وەرزشی یاریگا، وابڕیارە عەلی شاخەوان لەگەڵ بەرپرسانی یانەی قوە جەوییە کۆببێتەوە، بۆ ئەوەی لەبارەی داهاتووی خۆی بەرچاوی روونتر بێتەوە.

عەلی شاخەوان لە یاریی رابردووی قوە جەوییە بەرامبەر قاسم لەسەر کورسی یەدەک بوو، لوئەی سەڵاح هیچ دەرفەتی یاریکردنی پێنەدا، کە جەوییە بە گۆڵێکی بێبەرامبەر بە قاسم دۆڕا.

مانگێک لەمەوبەر تۆڕی وەرزشی یاریگا ئاشکرایکردبوو، لوئەی سەڵاح دەستبەرداری هیران ئازاد و حەمە ئیتۆ و عەلی شاخەوان نابێت، هەر سێ یاریزانە کوردەکە لە قوە جەوییە دەمێننەوە.