یاریگا –
ئەمشەو کاتژمێر 19:45 لە گەڕی پێنجەمی خولی ئەستێرەکانی عێراق، زاخۆ میوانداریی دهۆک دەکات.
زاخۆ لە یاریگای نێودەوڵەتی زاخۆ بە ناوبژیوانیەتی محەمەد تارق ئەحمەد لە یاریی دێربی بادینان میوانداریی دهۆک دەکات، کە وەرزی رابردوو لە چوون و گەڕانەوە هەردوو یانە بەبێ گۆڵ یەکسانبوون.
تۆڕی وەرزشی یاریگا لە فەیسبووک و یوتیوب بە دەنگی ئارمانج محەمەد کۆمێنتاری تایبەتی یارییەکانی خولی ئەستێرەکانی عێراق راستەوخۆ یارییەکە دەگوازێتەوە، لە ئەپلیکەیشنی یاریگاش سات بە سات ئەنجام و وردەکارییەکانی یارییەکە دەزانن.
یەکسانبوون بووەتە هاوواتای دێربی بادینان
دهۆک و زاخۆ لە دوایین پێنج رووبەڕووبوونەوەیان یەکسانبوون، لە دوایین پێنج رووبەڕووبوونەوەیان لە یارییە فەرمییەکاندا، دهۆک و زاخۆ لە خولی ئەستێرەکانی عێراق یەکسانبوون، تەنانەت وەرزی رابردوو لە یاریگای دهۆک و زاخۆ هیچ گۆڵێک نەکرا، هەردوولا 0-0 یەکسانبوون.
بەگوێرەی ئامارە بەردەستەکان دهۆک و زاخۆ لە خولی عێراقی 22 یارییان بەرامبەر یەکتری کردووە، 15 جار یەکسان بووینە، دهۆک 5 بردنەوەی بەدەستهێناوە و زاخۆش 2 بردنەوەی بەدەستهێناوە، دهۆک 19 گۆڵی لە یارییەکانی دێربی بادینان کردووە و زاخۆش 13 گۆڵی کردووە.
تەواوی یاریزانەکانی هەردوولا بۆ دێربی بادینان ئامادەن
سەرجەم یاریزانانی زاخۆ و دهۆک بۆ یاریی دێربی بادینان ئامادەن، مەسعود مەڕاڵ و تەڵال بلوشی بە تەواوی چەکەکانیانەوە بۆ ئەم یارییە ئامادەن.
لە چوار گەڕی رابردوو ئەنجام و ئامارەکانی زاخۆ لەم وەرزە باشترن، زاخۆ لە چوار یاری دوو بردنەوە و دوو یەکسانبوونی بەدەستهێناوە و تامی هیچ دۆڕانێکی نەکردووە، سوورپۆشەکان بە کۆکردنەوەی 8 خاڵ لە پلەی چوارەمی خولەکە دێن، 9 گۆڵیان کردووە و تەنیا 3 گۆڵیان لێکراوە.
دهۆک لە چوار گەڕی رابردوو تەنیا بردنەوەیەکی بەدەستهێناوە و لە دوو یارییش تووشی شکست بووە، هەڵۆیەکانی چیا بە کۆکردنەوەی 4 خاڵ لە پلەی پازدەم دێن، زەردپۆشەکان لە چوار یاری تەنیا گۆڵێکی کردووە و دوو گۆڵیشی لێکراوە.
پێکهاتەی پێشبینیکراوی زاخۆ بۆ یاریی دێربی بادینان
گۆڵپارێز: عەلی کازم
بەرگری: سیپان سەدیق، ئەحمەد ئیبراهیم، پاتریک مارسێلینۆ، محەمەد ئەبو حەشیش
ناوەڕاست: ئەحمەد عەلی عەبود، ئەمجەد عەتوان، مۆیسیس وۆلشیک
هێرشبەر: مەحموود ئەسوەد – گوستاڤۆ هێنریکی، ئەیوب نەناح
پێکهاتەی پێشبینیکراوی دهۆک بۆ یاریی دێربی بادینان
گۆڵپارێز: محەمەد ساڵح
بەرگری: سیابەند عەگید، لوکاس مۆسیس، ماسیس ئارتین، بەیار ئەبوبەکر
ناوەڕاست: پیتەر گورگیس، رۆبن ئاکوا، هاروون ئەحمەد، یانیک زاکری
هێرشبەر: بەحری شەرقی، کەریم دەروێش
