پێنجشەممە کریستیانۆ رۆناڵدۆ لە رێوڕەسمی تیروپشکی چامپیۆنزلیگ ئامادە دەبێت
فیدراسیۆنی تۆپی پێی ئەوروپا خەڵاتێکی تایبەت پێشکەشی کریستیانۆ رۆناڵدۆ دەکات
یاریگا –
رۆژی پێنجشەممە کریستیانۆ رۆناڵدۆ لە رێوڕەسمی تیروپشکی چامپیۆنزلیگ ئامادە دەبێت و فیدراسیۆنی تۆپی پێی ئەوروپا خەڵاتێکی تایبەتی پێشکەش دەکات.
فیدراسیۆنی تۆپی پێی ئەوروپا رایگەیاندووە، رۆژی پێنجشەممە لە مۆناکۆ، کریستیانۆ رۆناڵدۆ هێرشبەری پۆرتوگاڵی ئێستای یانەی نەسڕی سعوودی و پێشووی یانەکانی ریال مەدریدی ئیسپانی، یوڤێنتۆسی ئیتاڵی، مانچێستەر یونایتدی ئینگلیزی و سپۆرتینگ لیسبۆنی پۆرتوگاڵی لە رێوڕەسمی راکێشانی تیروپشکی وەرزی نوێی چامپیۆنزلیگ ئامادە دەبێت.
رۆناڵدۆ لە رێوڕەسمەکە لەلایەن ئەلێکساندەر سێفرین سەرۆکی یوێفا خەڵاتێکی تایبەتی یوێفای وەکو گۆڵکاری مێژوویی چامپیۆنزلیگ و یاریزانێکی کاریگەری کیشوەرەکە پێدەدرێت.
✨ UEFA Champions League all-time top scorer ✨
🏆 Record #UCL golden boot in seven different seasons
🏆 Record 17 goals in a single campaign
🏆 Record 140 goals in 183 games
@Cristiano will receive a special award from UEFA president Aleksander Čeferin this week in Monaco!— UEFA (@UEFA) August 27, 2024
کریستیانۆ لە چامپیۆنزلیگ لە 183 یاری 140 گۆڵی کردووە و گۆڵکاری مێژوویی خولەکەیە، هێرشبەرە پۆرتوگاڵییەکە پێنج جار نازناوی چامپیۆنزلیگی بەدەستهێناوە حەفت وەرزیش خەڵاتی گۆڵکاری بەدەستهێناوە و چەندان ریکۆردی گەورەی بەناوی خۆیەوە کردووە.
ئەلێکساندەر سێفرین سەرۆکی یوێفا لە لێدوانێکی بۆ ماڵپەڕی یوێفا ستایشی کریستیانۆی کردووە و لەبارەی هێرشبەرە پۆرتوگاڵییەکە دەڵێت :’کریستیانۆ رۆناڵدۆ یەکێکە لە ئەستێرە درەوشاوەکانی چامپیۆنزلیگ، زیاتر لە دوو دەیە لەسەر هەمان ریتم و ئاست بەردەوامە، ئەو هەمیشە تێنوو و تامەزرۆی گۆڵکردن و سەرکەوتنە و بێوچان هەوڵ دەدات’.
