یاریگا –
بە سەرپەرشتی لالیگا پڕۆژەی خەونەکە بۆ پێگەیاندنی یاریزانانی بەهرەمەند لە هەولێر و دوو شاری دیکەی عێراق دەکرێتەوە، بۆ ئەوەی یاریزانان بۆ هەڵبژاردە جیاوازەکانی عێراق پێبگەیەنن.
دوێنێ دووشەممە (12/08/2024) سەرۆکی لقەکانی فیدراسیۆنی تۆپی پێی عێراق بە سەرپەرشتی عەدنان دەرجال سەرۆکی فیدراسیۆنەکە لە بەغدا لەبارەی پڕۆژەی ‘خەونەکە’ کۆبوونەوە، کە وابڕیارە سەرەتای ساڵی نوێ لە هەولێر و بەغدا و بەسرە دەستپێبکات.
بێستوون ئەکرەم، سەرۆکی لقی هەولێری فیدراسیۆنی تۆپی پێی عێراق لەبارەی پڕۆژەی ‘خەونەکە’ بە تۆڕی وەرزشی یاریگای راگەیاند :’لە ناوەڕاستی مانگی شوبات/فێبرایەری ساڵی داهاتوو پڕۆژەی خەونەکە بۆ پێگەیاندنی یاریزانانی بەهرەمەند دەستپێدەکات، سەرەتا وابڕیارە وەکو قۆناخی یەکەم لە هەولێر و بەغدا و بەسرە سەنتەری پێگەیاندنی یاریزانانی بەهرەمەند بکرێتەوە، ئینجا دواتر تەواوی شارەکانی دیکەی عێراق بگرێتەوە’.
لەبارەی وردەکاریی پڕۆژەی ‘خەونەکە’ و سەنتەرەکەی هەولێر گوتی :’پڕۆژەکە لە هەر سێ شارەکە بە سەرپەرشتی راستەوخۆی لالیگا دەبێت، ئەوان پەیڕەو و پڕۆگرامی پڕۆژەکە دادەنێن، کە یاریزانان لە تەمەنی 6 ساڵی بۆ 17 ساڵی وەردەگیرێن، بەڵام هەموو یاریزانێک وەرناگیرێت، بەڵکو تەنیا یاریزانانی بەهرەمەند لەو پڕۆژەیە تۆمار دەکرێن، چونکە ئامانج لەم پڕۆژەیە ئەوەیە یاریزانی بەهرەمەند بدۆزرێتەوە و پێبگەیەنرێت بۆ هەڵبژاردە جیاوازەکانی عێراق’.
بێستوون ئەکرەم کە یەکێک بوو لە بەشداربووانی کۆبوونەوەکەی بەغدا، گوتیشی :’راهێنەرانی خۆماڵی بە سیستەم و پڕۆگرامی تایبەتی لالیگا سەرپەرشتی پڕۆژەکە دەکەن، سەرەتا بەڕێوەبەرێکی هونەری بۆ پڕۆژەکە دادەنرێت کە دەبێت بڕوانامەی راهێنەرایەتی Aـی هەبێت، دواتر بەگوێرەی ژمارەی یاریزانە بەهرەمەندەکان ژمارەی راهێنەرەکان بۆ سەرپەرشتیکردن و راهێنانی فێرخوازان دادەنرێت’.
