یاریگا –
لیڤەرپوول وەک پڕبینەرترین یانەی پرێمەرلیگ لەسەر ئاستی جیهان دەستنیشانکرا.
بەگوێرەی نوێترین ئاماری کۆمپانیای نیڵسن بۆ کۆکردنەوەی داتای تەلەڤزیۆن و پلاتفۆڕمەکانی سۆشیاڵ میدیا، لیڤەرپوول لە وەرزی 2023-24 پڕبینەرترین یانەی پرێمەرلیگ بووە.
لە کۆی 38 یاری وەرزی رابردووی پرێمەرلیگدا، زیاتر لە 471 ملیۆن کەس سەیری یارییەکانی لیڤەرپوولییان کردووە.
رێژەی بینەرانی یارییەکانی لیڤەرپوول 7% بەراورد بە وەرزی 2022-23 زیادبووە، رێژەی زیاترین بینەری لە چینە و ویلایەتە یەکگرتووەکانی ئەمریکا لە پلەی دووەمدا دێت.
کۆمپانیای نیڵسن بڵاویکردووەتەوە، یاریی نێوان لیڤەرپوول و ئارسیناڵ لە دیسێمبەر/کانوونی یەکەمی ساڵی 2023 پڕبینەرترین یاریی لیڤەرپوول بووە و تەنیا لە ئەمریکا، زیاتر لە 2.28 ملیۆن کەس سەیری یارییەکەیان کردووە.
جیا لە بینەری کەناڵەکانی تەلەڤزیۆن و پلاتفۆڕمەکانی دیجیتاڵی، یارییەکانی ئامادەکاری لیڤەرپوول بۆ وەرزی نوێ لە ئەمریکا زۆرترین هاندەری هەبووە. زیاتر لە 69 هەزار کەس ئامادەی یارییەکەی لیڤەرپوول بەرامبەر ئارسیاڵ لە یاریگای لینکۆڵن فاینانشیاڵ فیڵد لە فیلادێلفیا بوون، ئەمەش ریکۆردی ئامادەبوونی لە یاریگاکەی شکاند.
هەروەها لە یاریی نێوان لیڤەرپوول و مانچێستەر یونایتد لە یاریگای ویڵیامس بڕایس لە کاڕۆلاینای باکوور، زیاتر لە 77 هەزار کەس ئامادەی یارییەکە بوون.
ئەمە لە کاتێکدایە، لیڤەرپوول پڕ-ئینگەیجمێنترین یانەی پرێمەرلیگە لە پلاتفۆڕمەکانی سۆشیاڵ میدیا. بەگوێرەی دوایین داتاکان بێت، زیاتر لە 1.5 ملیار ئینگەیجمێنتی هەیە، هەروەها خاوەن زۆرترین ڤیوی سۆشیاڵ میدیاییە و ژمارەکەی دەگاتە 11.9 ملیار ڤیو.
لەلایەکی دیکەوە، لیڤەرپوول بووە یەکەم یانەی پرێمەرلیگ، ژمارەی سەبسکرایبەکانی بگاتە 10 ملیۆن لە یوتیوب.
