یاریگا –
ئێرلینگ هالاند، هێرشبەری مانچێستەر سیتی دان بە قورسی بردنەوەی یارییەکەی بەرامبەر تۆتنهام دەنێت، بەڵام دەڵێت؛ بەلامەوە گرنگ نییە چۆن سەرکەوتین.
مان سیتی 0-2 لە سپێرزی بردەوە و بە کۆکردنەوەی 88 خاڵ گەڕایەوە پێشەنگایەتی پرێمەرلیگ، بە جیاوازی دوو خاڵ لەگەڵ ئارسیناڵی خاوەن پلەی دووەم.
هالاند دوو گۆڵی لە یارییەکە کرد و وەڵامی رەخنەگرانی دایەوە، لە دوای یارییەکە بە تۆڕی BBC گوت
یارییەکە زۆر سەیر بوو، هەست و ناڕەحەتییەکە زۆر بەدی دەکرا، ئەم جۆرە هەستانە لە یاری لەمشێوەیە ئاساییە، بەڵام سەرکەوتین و ئەمە ئامانجەکە بوو. گرنگ نییە چۆن سەرکەوتین، بەڵام ئێستا بردمانەوە و ئامادەکاری بۆ یاری داهاتوو دەکەین.
لەبارەی دڵەڕاوکێی بوونی ئۆفساید لە ساتی گۆڵی یەکەمی یارییەکە، هالاند دەڵێت
بەڵێ هەندێک نیگەران بوون، چونکە بینیم لەسەر یەک هێڵ بووین و هەندێک ترسام ئۆفساید بم. بەڵام بۆ ئەم مەبەستە تێکنۆلۆجیای ڤار هەیە.
هالاند باسی گۆڵی دووەم و لێدانە سزاکەی بەمجۆرە کرد
تەنگژە دایگرتبووم و دەترسام. بەڵام لە هەمان کاتدا زۆر بە پەرۆش بووم. ئەرکی سەرەکی من هەژاندنی تۆڕی گۆڵ بوو. ئێستا زۆر دڵخۆش و ئاسوودەم و سەرنجم لەسەر یاری داهاتوو داناوە.
مانچێستەر سیتی دوا یاری ئەم وەرزە لە یاریگای ئیتیحاد بەرامبەر وێستهام یونایتد دەکات، ئارسیناڵیش لە یاریگای ئیماڕات میوانداری ئێڤەرتن دەکات.
