ناکۆکی میلان و کرۆنیچ لەسەر نوێکردنەوەی گرێبەستەکە
یاریگا
ڕادێ کرۆنیچی تەمەن 29 ساڵ، یاریزانی یانەی میلان بەهۆی ئاستە بەرزەکەی بووەتە یاریزانی سەرەکی لە پلانەکانی ستیفانۆ پیۆلی، بەڵام نوێکردنەوەی گرێبەستەکەی ئاسان نابێت.
جیانلوکا دی مارزیۆ بڵاویکردەوە، میلان و ڕادێ کرۆنیچ کۆبوونەوەیەکیان هەبووە بۆ دانوستان لەسەر نوێکردنەوەی گرێبەستەکەی نێوانیان، بەڵام داواکارییەکانی ئەو یاریزانە جیاوازە لە پێشنیارەکەی ڕۆسۆنێری. بە لەبەرچاوگرتنی تەمەنی یاریزانەکە و خواستەکانی، میلان دوو دڵە لە نوێکردنەوەی گرێبەستی ئەو یاریزانە بۆسنییە.
گرێبەستەکەی ڕادێ کرونیچ لەگەڵ میلان تا هاوینی 2025 کارا دەبێت و مووچەی ساڵانەی ئەو یاریزانە یەک ملیۆن و نیو یۆرۆیە و دەتوانێت بگاتە 2 ملیۆن یۆرۆ لەگەڵ چەند بڕگەیەکی ئاسان.
داواکاریی بەڕێوەبەری کارەکانی ڕادێ کرۆنیچ لە میلانۆوە بۆ نوێکردنەوەی گرێبەستی یاریزانەکە تا هاوینی 2027 بە مووچەی ساڵانەی 3 ملیۆن یۆرۆیە. بەڵام میلان موچەی ساڵانەی 2 ملیۆن یۆرۆی بۆ ڕاد کرونیچ لەگەڵ پاداشتەکانی پێشکەش کردووە، کە جیاوازییەکی بەرچاوی لەگەڵ داواکاری یاریزانەکە هەیە.
