پاریس سانجێرمان جدییە؛ پارە و یاریزانی پێویستی بۆ یەکلایی کردنەوەی گرێبەستێکی گەورە هەیە

یاریگا –

یانەی پاریس سانجێرمان بەدوای رێگەیەکدا دەگەڕێت تاوەکوو گۆنچالۆ رامۆس و کانگ ئین لی بفرۆشێت.

ئاتلێتیکۆ مەدرید هەردوو یاریزانەکەی بەدڵە. یانە سوور و سپییەکە دەیەوێت خولیان ئالڤارێز لە مەدرید بمێنێتەوە، بەڵام پاریس سانجێرمان هەم پارە و هەم یاریزانی پێویستی هەیە بۆ ئەوەی رێگە بۆ گواستنەوەی جاڵجاڵۆکەکە خۆش بکات.

چاوەڕوان دەکرێت لە بازاڕی گواستنەوەدا ئاتلێتیکۆ هاوینێکی زۆر جەنجاڵی هەبێت. لە ئێستاوە باس لە چەندین ناو دەکرێت، هەم بۆ هاتن و هەم بۆ رۆیشتنیش. یەکێک لەوانە خولیان ئالڤارێزە، وەکوو ئەوەی رۆژنامەی ئاس، لە رۆژانی رابردوودا بڵاوی کردووەتەوە. چەندین یانەی گەورەی ئەوروپا چاودێریی داهاتووی ئەم هێرشبەرە دەکەن و یەکێک لەوانە پاریس سانجێرمانە، کە ئامادەیە بۆ جووڵەکردن بۆ واژۆکردنی گرێبەست لەگەڵ یاریزانە ئەرجەنتینییەکە.

پاریس سانجێرمان توانای دارایی هەیە بۆ ئەنجامدانی گرێبەستێک کە بەهاکەی زیاتر لە 100 ملیۆن یۆرۆ بێت. ئاتلێتیکۆ چەندین جار گوتوویەتی کە پشتیان بە جاڵجاڵۆکەکە بەستووە و دەیانەوێت تیمی وەرزی داهاتوو لە دەوری ئەو بنیاد بنێن، بەڵام ئەگەر یانە پاریسییەکە بە جدی فشار بکات، رەنگە شتەکان بگۆڕێن. بارسێلۆناش لە نزیکەوە چاودێریی دۆخەکە دەکات، بەڵام توانای دارایی وەکوو یانە فەرەنسییەکەی نییە.

لویس ئێنریکی واژۆکردنی گرێبەست لەگەڵ خولیان ئالڤارێز وەکوو لەپێشینەی کارەکانی دەبینێت. جگە لە پارە، پاریس سانجێرمان یاریزانیشی هەیە کە سەرنجی ئاتلێتیکۆیان راکێشاوە. یەکێک لەوانە کانگ ئین لی’ـیە. ئەم رۆژنامەیە لە 17ـی کانوونی دووەمدا ئاشکرای کرد کە ماتیو ئالیمانی گەشتی پاریسی کردووە بۆ گفتوگۆکردن دەربارەی یاریزانە کۆرییەکە. بەرپرسەکەی ئاتلێتیکۆ نەیتوانی لە وەرزی گواستنەوەی زستانەدا گرێبەستی لەگەڵ بکات، چونکە لویس ئێنریکێ لەو کاتەدا نەیدەویست بڕوات، بەڵام هێشتا یاریزانێکە کە لای ئالیمانی زۆر پەسەندە.

لە تەمەنی 25 ساڵیدا و بە بەهایەکی بازاڕی نزیکەی 28 ملیۆن یۆرۆ، پاریس سانجێرمان ئامادەیە لەم هاوینەدا رێگەی پێ بدات بڕوات. کانگ تاوەکوو ساڵی 2028 گرێبەستی هەیە و لەم وەرزەدا یاریزانێکی گرنگ نەبووە لای لویس ئێنریکێ. 38 یاریی کردووە، چوار گۆڵی کردووە و پێنج ئەسیستی هەبووە، یانە پاریسییەکە بەدوای رێگەیەکدا دەگەڕێت بۆ رۆیشتنی. لی دەتوانێت لە چەندین پێگەی هێرشبەریدا یاری بکات، خێرایە و توانای گۆڵکردنی هەیە.

یاریزانەکەی دیکە کە لای ئالیمانی پەسەندە، گۆنچالۆ رامۆسە، هێرشبەرە پۆرتوگالییەکە 24 ساڵییەکە. ئەویش تاوەکوو ساڵی 2028 گرێبەستی هەیە و بەهای بازاڕی 35 ملیۆن یۆرۆیە. گۆنچالۆ یاریزانێکە لای بەشی وەرزشی ئاتلێتیکۆ پەسەندە و پاریس سانجێرمانیش دەیەوێت لەم هاوینەدا بیفرۆشێت.

ئەم هێرشبەرە پورتوگالییە لەم وەرزەدا 42 یاریی کردووە و 12 گۆڵی هەیە، هەرچەندە رۆڵی سەرەکی لە پاریس سانجێرمان نەبووە. چەندین یانەی ئەوروپا چاودێریی گواستنەوەی ئەم هێرشبەرە دەکەن. ئاتلێتیکۆ دەیەوێت خولیان ئالڤارێز بمێنێتەوە و رای یاریزانەکەش گرنگ دەبێت. بریکارەکانی دەزانن کە پاریس سانجێرمان جدییە و لەپشت پەردەشەوە یاریزانانی وەکوو کانگ ئین لی و گۆنچالۆ رامۆس هەن.