بارسێلۆنا پاداشتە داراییەکانی یاریزانەکانی نەداوە

یاریگا –

یاریزانانی تیپی یەکەمی بارسێلۆنا بۆ بردنەوەی جامی سوپەر پاداشتێکی زۆر کەمیان وەرگرتووە، لەکاتێکدا تا ئێستا هیچ پاداشتێک نەخراوەتە سەر هەژمارەکانیان لەبەرامبەر بردنەوەی لالیگا.

ئاس ئەمڕۆ نووسیویەتی، یانەی بارسێلۆنا تاوەکوو ئێستا هیچ پاداشتێکی به ئەندامانی تیپی یەکەمی نەداوه به هۆی بەدەست هێنانی ناسناوی لالیگا و له ئێستادا هیچ پلانێکی بۆ ئەوە نییە. کاتێک چاڤی راهینەری بارسیلۆنا، پرسیاری لە بەڕێوەبەرانی یانەکەی کرد لەو بارەیەوە، لە وەڵامدا پێیان گووتووە کاتێک دۆخی ئابووری یانەکە باشتر بوو، پاداشتێکی تایبەت بۆ پاڵەوانێتی لالیگا دەدرێت بە یاریزانان و ئەندامانی دیکەی تیپی یەکەم.

خاڵێکی سەرنجڕاکێش ئەوەیە کە بارسیلۆنا تەنها بڕی 10 هەزار یۆرۆی وەکوو پاداشت داوە بە یاریزانەکانی بە بۆنەی بردنەوەی جامی سوپەری ئیسپانیا ئەمەش تەنها لەبەر ئەوەی یەکەم جامی سوپەر بووە لەسەردەستی چاڤی بەدەستیان هێناوە، هەر لەبەر ئەم هۆکارەش ​​بڕیار دراوە بڕە پاداشتێک بدرێت، هەرچەندە گەر کەمیش بێت، بەڵام لە بابەتی لالیگادا، پێشوەختە هیچ پلانێک نەبووە و یانەکەش بڕی پارەی پێویستی نەبووە.

چاڤی لە کاتێکدا لە بارسێلۆنا دەستیپێکرد کە بارودۆخی تیپەکە لەژێر دەستی رۆناڵد کومان بە هیچ شێوەیەک باش نەبوو، لە وەرزی یەکەمیشدا هیچ ئەنجامێکی نەبوو جگە لە بردنەوەی پشکێک. بارسا لەگەڵیدا لە سەرجەم جامەکان کشایەوە، بەڵام توانی ببێتە پلەی دووەمی لالیگا و پشکی چامپیۆنزلیگ بەدەستبهێنێت. لە وەرزی پێشوودا بارسای کردە پاڵەوانی لالیگا و جامی سوپەر، بەڵام لە جامەکانی تردا سەرکەوتنی بەدەست نەهێنا.

ئاس دەڵێت، یاریزانەکان دوای گەڕانەوەیان بۆ ئیسپانیا و دوای گفتوگۆی زۆر لەگەڵ خوان لاپۆرتا، رێککەوتوون لەسەرئەوەی کە پاداشتیان پێبدرێت بە بۆنەی بردنەوەی جامی سوپەر، ئەگینا هیچ هەواڵێک لەم پاداشتەش نەبوو.

لە گرێبەستی یاریزانانی یانە کەتەلۆنییەکەدا ئاماژە بەوە کراوە، ئەگەر بتوانن ناسناوی لالیگا و چامپیۆنزلیگ بەدەست بهێنن، بەدڵنیاییەوە پاداشت وەردەگرن. سەرنەکەوتنیان لە چامپیۆنزلیگدا وایکرد یاریزانەکان پێداگری لەسەر وەرگرتنی پاداشتی پاڵەوانێتی لالیگا نەکەن و دەبێت بزانرێت ئایا ئەمساڵیش هەمان دۆخ لە بارسادا زاڵ دەبێت یاخود نا.