یاریگا-
محەمەد سەڵاحی میسڕی و ئەستێرەی یانەی لیڤەرپولی ئینگلیزی ئامادەکاری دەکات بۆ ڕووبەڕووبوونەوەی مانچێستەر سیتی ، لە یاری کۆتایی جامی قەڵغانی خێرخوازی، پێش دەستپێکردنی وەرزی نوێی 2022/2023.
وا بڕیارە ئەمڕۆ شەممە كاتژمێر 19:00 بە كاتی كوردستان هەردوو یانەی مانچێستەر سیتی و لیڤەرپول لە یاری جامی قەڵغانی خێرخوازی ڕووبەڕووی یەك ببنەوە.
محەمەد سەڵاح بەرامبەر مانچێستەر سیتی بەدوای بردنەوەی پاڵەوانێتییەکەیە بۆ یەکەمجار لەگەڵ لیڤەرپوول، دوای ئەوەی لە ساڵی 2019 بەرامبەر مانچستەر سیتی شكستیهێنا و دواتریش لە 2020 بەرامبەر ئارسناڵ بە لێدانی سزا نازنەوەكەیان لەدەستدا.
محەمەد سەڵاح لە لێدوانێكیدا بۆ ماڵپەڕی فەرمی یەكێتی تۆپی پێی ئینگلتەرا دەڵێت: من هەموو شتێكم لەگەڵ لیڤەرپوول بردەوە، تێبینی ئەوەم نەكرد تا ئەلێكساندەر ئارنۆڵد دوای یاری كۆتایی جامی یەكێتی ئینگلتەرا هات و ئەم زانیاریەی پێ وتم: ئێمە هەموو شتێكمان لێرە لەگەڵ لیڤەرپوول بردووەتەوە”.
سەبارەت بە گرێبەستی لیڤەرپوول لەگەڵ داروین نونیزی ئۆرۆگوایی، سەڵاح وتی: زۆر بە پەرۆشم و دەمەوێت لەگەڵ نونێز یاری بکەم، وەرزێکی باشی بەسەر برد و لە وەرزی رابردوو لە چامپیۆنزلیگ لەگەڵ بەنفیکا یارییەکی باشی کرد بەرامبەر ئێمە.
وە دەربارەی ڕۆیشتنی سادیۆ مانێ وتی: سادیۆ مانێ ڕۆیشت و بیری دەکەم، چەند وەرزێكی نایابی لەگەڵ یانەکەدا بەسەر برد، بۆیە هیوای سەرکەوتنی بۆ دەخوازم، هەروەها هیوای سەرکەوتن بۆ نونێزیش دەخوازم.
سەڵاح لە کۆتایی لێدوانەکانیدا وتی: پێموایە لە دۆخێکی باشداین بۆ ئەوەی بجەنگین بۆ بردنەوەی هەموو شتێک، لەگەڵ گرێبەستە نوێیەکانیش تەنها پێویستە بەردەوام بین لە کارکردن، بە شێوەیەكی ئەرێنی لە شتەكان بڕوانین.
