سۆرگان هازارد: براکەم ئەستێرەیەکی جیهانییە و سەرکردەی ئێمەیە
یاریگا-سۆرگان هازارد برای ئیدێن هازارد باسی دۆخی براکەی دەکات و ئامۆژگارییەکی هەیە بۆی.
ئێستا دوو براکە لە کامپی مەشقی هەڵبژاردەی بەلجیکان بۆ پاڵاوتنەکانی جامی جیهانی. کاتێک باسی بارودۆخی براکەی لێکرا، سۆرگان وتی “یەکەمجارە لە ژیانیدا خۆی لەسەر کورسی یەدەگ دەبینێتەوە، ئەو ئەستێرەیەکی جیهانییە و سەرکردە و کاپتنی ئێمەیە، ساتێکی قورسە بۆ ئەو و شایستەی یاریکردنی زیاترە، لە ئێستادا ڤینیسیوس لە شوێنی ئەو یاری دەکات و لە ئاستێکی بەرزدایە. زەحمەتە بتوانی بەو کاتە کەمەی پێت دەدرێت بتوانیت خۆت بۆ راهێنەر بسەلمێنیت بەڵام هەندێک جار پێنج خولەکە بەسە تاوەکو بتوانیت گۆڕانکاری دروست بکەیت. ئامۆژگاریم بۆی ئەوەیە بەردەوام مەشقبکات و هەوڵبدات تاوەکو بگاتەوە ئاستی راستەقینەی”.
لەوکاتەوەی پەیوەندی بە ریاڵ مەدریدەوە کردووە هازارد بەدەست پێکانەوە دەناڵێنێت ،لە ئێستادا لە پێکانەکەی چاکبووەتەوە بەڵام متمانەی راهێنەر ئەنشلۆتی لەدەست داوە و یاری پێناکرێت.
