یاریگا–
رۆناڵد کومان، راهێنەری هۆڵەندی یانەی بارسێلۆنای ئیسپانیا لە کۆنگرەی رۆژنامەوانی یاری پێش یانەکەی بەرامبەر لیڤانتی رەتیکردەوە ئەوان لە بازنەی رکابەری کردن لەسەر بەدەست هێنانی ناسناوی ئەم وەرزەی لالیگا دەرچووبن.
راهێنەرەکەی بارسا لەمبارەوە گووتی ” بارودۆخەکە هەروەکو هەفتەکانی رابردووە و تەنها یارییەک کەمتر بووە و ئاتلیتیکۆ مەدریدیش پێشەنگە، نابێت خۆمان دڵگران بکەین و بەردەوام دەبین لەسەر رکابەری کردن، پێویستە تەنها بیر لە بردنەوەکان بکەینەوە، راستە ئەنجامەکەی هەفتەی رابردوو بە دڵمان نەبوو، بەڵام نابێت ئەوەشمان لەبیر بچێت بەرامبەر پێشەنگی خوڵ و بەدەست هێنانی خاڵێک خراپ نیە ”.
کومان لەبەشێکی دیکەی قسەکانیدا ئاماژەی بە داهاتووی لەگەڵ یانەکەی کرد و گووتی ” سەرۆک هەر لە یەکەم رۆژەوە دڵنیای کردومەتەوە پاڵپشتی ئێمە دەکات، منیش گرێبەستی دوو ساڵەم لەگەڵ یانە هەیە و وەرزی داهاتوو لەگەڵ یانەکەم بەردەوام دەبم ”.
