یاریگا –
پاریس سانجێرمان زۆر گەشبینە بەوەی بۆ یاری کۆتایی خولی پاڵەوانەکانی ئەورووپا بەرامبەر ئارسناڵ، بە نزیکەیی پێکهاتەیەکی تەواویان لەبەردەست دەبێت.
هەواڵە ئەرێنییە سەرەکییەکە پەیوەندی بە ئەشرەف حەکیمییەوە هەیە. بەرگریکارە مەغریبییەکە یاریی گەڕانەوەی پێشکۆتایی بەرامبەر بایرن میونشنی لەدەستدا بەهۆی کێشەی ماسوولکەی پشتێنەی ران، کە لە یاریی چووندا تووشی ببوو، بەڵام چاکبوونەوەکەی بە باشی بەڕێوە دەچێت. ئەگەر هەموو شتێک بە ئاسایی بەردەوام بێت، پاریس سانجێرمان پێشبینی دەکات بۆ یاریی کۆتایی ئامادە بێت.
هەروەها گەشبینییەکیش هەیە سەبارەت بە لوکاس شۆڤالیێ. گۆڵپارێزەکە هەفتەی رابردوو لە کاتی راهێنانەکاندا لە رانیدا تووشی پێکان بوو، کە سەرەتا مەترسی ئەوەی دروست کردبوو کە وەرزەکەی کۆتایی هاتبێت، بەڵام دۆخی باشتر بووە و دەتوانێت بەم زووانە بگەڕێتەوە نێو پێکهاتەی تیمەکە.
لویس ئێنریکێی راهێنەر و ستافەکەی ئێستا زیاتر سەرنجیان لەسەر رێکخستنی ئاستی جەستەیی یاریزانەکانە دوای یارییە هیلاککەرەکەی میونشن. بەگوێرەی راپۆرتەکان عوسمان دێمبێلێ دوای هەوڵە بەرگرییە چڕەکانی لە کاتی یارییەکەدا تەواو هیلاک بووە و لە خولەکی 65 گۆڕانکاری پێکرا.
وارن زایر ئێمری بە ئازارێک لە پشتیدا لە ئەڵمانیا گەڕایەوە، ئەمەش مانای ئەوەیە پاریس سانجێرمان لە رۆژانی داهاتوودا بە وریاییەوە مامەڵە لەگەڵ کاتی یاریکردنی دەکات.
هەروەها سەبارەت بە ماتڤی سافۆنۆڤ وریایی هەیە. گۆڵپارێزەکە لە یاریی چوونی بەرامبەر بایرنەوە بەدەست ئازاری بەردەوامی ماسوولکەی قاچی دەناڵێنێت و تەنیا یەک یەکەی راهێنانی تەواوی لەگەڵ تیمەکە ئەنجامدابوو پێش یاریی گەڕانەوە لە میونشن.
لە هەمان کاتدا، پێشبینی دەکرێت ویلیان پاچۆ و نونۆ مێندێش، کە هەردووکیان کێشەی رانی راستیان هەیە، یاریی ئەم یەکشەممەیەی خول بەرامبەر برێست لەدەست بدەن. بەڵام دەگوترێت ستافی پزیشکی پاریس سان جێرمان سەبارەت بە ئامادەیی ئەوان بۆ یاریی کۆتایی چامپیۆنزلیگ نیگەران نین.
