هەندێک یاریزان هەن لە ئاستی ریال مەدرید نین؛ ئەستێرەکانی جیهان قسەی خۆیان دەکەن

یاریگا –

ریال مەدرید ماڵاوایی لە خولی یانە پاڵەوانەکانی ئەوروپا و بە نزیکەیی لەم وەرزەش کرد، چونکە ئێستا لالیگاشی لە دەستچووە. سەرەڕای ئەوەی تاوەکوو کۆتایی لە میونشن جەنگان، تیمەکەی ئالڤارۆ ئاربێلوا نەیتوانی بەسەر بایرن میونشن دا سەربکەوێت و ئێستا قۆناخی پێداچوونەوە دەست پێدەکات. چەندین یاریزانی پێشوو شیکارییان بۆ یارییەکە کردووە.

ئیمانوێل پێتیت پێی وایە مەدرید پێویستی بە گۆڕانکارییە لە پێکهاتەکەیدا بۆ ئەوەی دووبارە بگەڕێتەوە سەر رێچکەی بردنەوە:

هەندێک یاریزان هەن لەو ئاستەدا نین کە بۆ یاریکردن لە ریال مەدرید پێویستە. ئەوان پێویستە گۆڕانکاریی بکەن بۆ ئەوەی لەم جۆرە یارییانەدا سەرکەوتن بەدەست بهێنن.

تیێری هێنریش باسی لە مشتومڕەکانی یارییەکە کرد و گوتی:

هاندەرانی مەدرید تۆڕە کۆمەڵایەتییەکان پڕ دەکەن لە سکاڵا دژی ناوبژیوان. دەڵێن کارتی زەردی دووەمی ئێدواردۆ کاماڤینگا شەرمەزاری بوو، زۆر سووک بوو بۆ یارییەکی چارەکی کۆتایی خولی یانە پاڵەوانەکانی ئەوروپا و ناوبژیوانەکان لایەنگرییان کردووە، بەڵام دەبێت تێبگەیت: کاتێک لە دەرەوەی یاریگای خۆت و لە ئالیانز ئارێنا یاری دەکەیت، نابێت هیچ هۆکارێک بدەیتە دەست ناوبژیوان بۆ ئەوەی بڕیار بدات. دەبێت لەوە ژیرتر بیت.

هێنری قسەی لەسەر جوانیی یارییەکەش کرد و گوتی:

چ یارییەک بوو! مەدرید لە گێمی یەکەمدا بە تەواوی باڵادەست بوو بەهۆی ئاردا گولەر و کیلیان ئێمباپێوە، هەموو بینەرانیش وایان دەزانی ریمۆنتادا تەواو بوو. دواتر بایرن لە گێمی دووەمدا هاتە ناوەوە، سوودیی لە زیادە ژمارەی یاریزانەکانیان وەرگرت و یاریگایان کردە ‘ئامێری جلشۆر’، بە تەواوی خنکاندیانن. ئەو گۆڵەی مایکڵ ئۆلیس لە کاتی زیادکراودا کە ئەنجامەکەی کردە پێنج گۆڵ، کۆتایی بە هەموو شتێک هێنا، چ گۆڵێک بوو. نیشاندانی ئەو ئاستە لە هێمنی و متمانە بەرامبەر ریال مەدرید لە خولەکی 94 شتێکی تایبەتە. مەدرید وایدەزانی خۆیان پاشای گەڕانەوەن، بەڵام بایرن هەمان دەرمانی خۆیانی دەرخوارد دان.

دانیێل ریۆلۆ بۆچوونی وایە سەرەڕای دوورخرانەوەیان لە راستییدا مەدرید باش یارییان کرد و گوتی:

ریال یارییەکی سەرسوڕهێنەری ئەنجامدا. لە رووی تاکتیکییەوە نایاب نەبوو، بەڵام ئەو یارییەیان کرد کە دەیانویست. زۆر دوور نەبوون لەوەی ببنە قوربانی دزییەکی وەرزشی.

ستێڤن جێرارد و ستیڤ مەکمانامان بەرگرییان لە ئاربێلوا کرد و پێیان وابوو رەنگە کارەکەی لەدەست بدات تەنانەت ئەگەر شایەنیشی نەبێت:

پێدەچێت ئاربێلوا کارەکەی لەدەست بدات، بەڵام پێم وانییە شایەنی ئەوە بێت.

لە کۆتاییدا، وێسلی شنایدەر زۆر توند بوو بەرامبەر کاماڤینگا دوای کارتە سوورەکەی و گوتی:

کاماڤینگا گەمژەیە. دەزانن یاریزانانی ریال مەدرید دەبوو چی بکەن دوای فیکەی کۆتایی؟ دەبوو راستەوخۆ بچنە ژووری خۆگۆڕین و تووڕەیی خۆیانی نیشان بدەن. پێم وانییە شایەنی ئەوە بێت بچێتە جامی جیهانی.