یاریگا
فێدراسیۆنی تۆپی پێ ئەوروپا یوێفا بەشێوەیەکی فەرمی لەسەر کەیسی ئێنریکێز نێگرێیرا، جێگری سەرۆکی پێشووی لیژنەی ناوبژیوانانی خولی ئیسپانیا دەست بە لێکۆلینەوە دەکات.
دوای بڵاوبونەوەی دەنگۆی پێدانی پارە لەلایەن کارگێری پێشووی یانەی بارسێلۆنا بە جێگری سەرۆکی پێشووی لیژنەی ناوبژیوانانی لالیگا، کاردانەوەیەکی زۆری بە دوای خۆیدا هێنا، ئێستاش یەکێتی تۆپی پێ ئەوروپا یوێفا بەشیوەیەکی فەرمی رایگەیاند ئەوان بە پێ ماددەی 31.4. لە رێگەی لیژنەیەکی تایبەت بە خۆیانەوە، لەسەر ئەم کەیسە لەگەڵ یانە ئیسپانیەکە دەست بە لێکۆلینەوە دەکەن و لە ماوەیەکی کورت ئەنجامی لێکۆلینەوەکە ئاشکرا دەکەن.
دوای بڵاوبونەوەی ئەو دەنگۆیانە، داواکاری گشتی ئیسپانیا بەفەرمی سکاڵای لەسەر یانەی بارسێلۆنا تۆمار کرد، بەڵام دادگای ئەم وڵاتە هیچ بەڵگەیەکی دەست نەکەوت، بۆیە فێدراسیۆنی تۆپی پێ ئەوروپا بڕیاریداوە خۆیان لە رێگەی لیژنەیەکی تایبەت لێکۆلینەوە لەسەر ئەم کەیسە بکەن.
لە یاساکانی یوێفادا هاتووە، هەر یانەیەک نابژیوانەکان بکڕێتەوە ئەو کاتە بۆ ماوەی یەک وەرز لە پاڵەوانتیە ئەوروپیەکان دوور دەخرێتەوە، بۆیە ئەگەر ئەم تۆمەتە لەسەر بارسێلۆنا ساغ ببێتەوە، ئەو کات رێگە بە بلاوگرانا نادرێت وەرزی داهاتوو بەشداری چامپیۆنزلیگ بکەن.
