پیویستی بە دانوستانە؛ گۆڵپارێزیکی ئارسیناڵ بیر لە جێهێشتنی یانەکە دەکاتەوە

یاریگا –

کێپا ئاریزابالاگا کە ئێستا لەگەڵ ئارسیناڵ پاڵەوانی پرێمەرلیگە، بیر لە جێهێشتنی یاریگای ئیمارات دەکاتەوە لەپێناو بەدەستهێنانی پێگەیەکی سەرەکی. هەر هەنگاوێک پێویستی بە دانوستان دەبێت لەگەڵ گەنەرز.

مانەوە یان رۆیشتن؟ ئەمەیە پرسیارەکە. دەستپێکی کاروانی کێپا ئاریزابالاگا لەگەڵ ئارسیناڵ بێوێنە بوو. دوای وەرزێکی سەرنجڕاکێشی 2024-2025 لەگەڵ بۆرنمس، گەنەرز گرێبەستی لەگەڵ گۆڵپارێزە ئیسپانییەکەدا واژۆ کرد و لە یەکەم وەرزی خۆیدا لە یاریگای ئیمارات، ئارسیناڵ نازناوی پرێمەرلیگی بەدەستهێنا. ئەوان هاوکات گەیشتنە یاریی کۆتایی چامپیۆنزلیگ، نازناوێک کە کێپا پێشتر لەگەڵ چێڵسی و ریال مەدریددا بردیبوویەوە و لەگەڵ بوونی کێپا لە گۆڵدا، ئارسیناڵ لە یاریگای وێمبڵی لە جامی قەڵخانی خێرخوازیدا رووبەڕووی مانچێستەر سیتی بووەوە، بەڵام گۆڵپارێزە ئیسپانییەکە زیاتری دەوێت.

بۆ ئێستا دەیڤد رایا گۆڵپارێزی ژمارە یەکی بێ رکابەری میکێل ئارتێتایە. ئەگەرچی کێپا بۆ زیاترکردنی کێبڕکێ لەسەر پێگەی سەرەکی گەیشتە باکووری لەندەن، بەڵام رایا کە هاوکات لەگەڵ ئیسپانیا لەژێر سەرپەرشتیی لویس دێلا فوێنتێ لە مۆندیالە، دەرفەتەکانی هاوتیپەکەی لە ماوەی وەرزی 2025-2026 سنووردار کردووە. بە گشتی کێپا تەنیا کەمێک زیاتر لە 1,000 خولەک لە 12 یارییدا لە سەرجەم پاڵەوانییەتییەکاندا یاریی کردووە.

هەر لەبەر ئەمەشە، بەگوێرەی زانیارییەکانی رۆژنامەی ئاس، ئەم گۆڵپارێزە بەڕەگەز خەڵکی بیلباوە ئامادەیە لەم هاوینەدا یاریگای ئیمارات جێبهێڵێت و دەست بە قۆناخێکی نوێ بکات لە یانەیەکدا کە بتوانێت پێگەی سەرەکیی خۆی تێدا بەدەستبهێنێتەوە. کێپا ، کە بە بڕی شەش ملیۆن یۆرۆ گەڕایەوە لەندەن، گرێبەستەکەی تاوەکوو ساڵی 2028 بەردەوامە. کڕینی ئەم دواییەی ئیلان مێسلەر، کە بە گرێبەستێکی دوو ساڵە لەگەڵ بژاردەی ساڵی سێیەم وەکوو گۆڵپارێزی سێیەمی یانەکە پەیوەندی بە ئارسیناڵەوە کرد، دۆخەکەی کێپا ناگۆڕێت: ئیسپانییە تەمەن 31 ساڵەکە هێشتا جێگرەوەی سەرەکیی دەیڤد رایایە.

میکێل ئارتێتا رێز لە تواناکانی کێپا دەگرێت و کێپاش لە ئارسیناڵ دڵخۆشە. سەرەڕای ئەوەش، بیرۆکەی بوونەوە بە گۆڵپارێزی یەکەم وەکوو ئەوەی لە بۆرنمس لەژێر سەرپەرشتیی ئاندۆنی ئیراولادا بوو، شتێکە کە بەردەوام سەرنجی رادەکێشێت. بازاڕی گواستنەوەی هاوینە هێشتا لەژێر کاریگەریی یارییەکانی مۆندیالدایە و گۆڵپارێزەکەی پێشووی ئاتلێتیک بلباو، چێڵسی و ریال مەدرید هێشتا هیچ ئۆفەرێکی فەرمیی پێ نەگەیشتووە. بۆ ئێستا، تەنیا گفتوگۆیەکی سەرەتایی سەبارەت بە ئەگەریی رۆیشتنی ئەو لە ئارادا هەیە.

ئەگەر ئەو بڕیار بدات کۆتایی بە ماوە کورتەکەی لە یاریگای ئیمارات بهێنێت، دەبێت کێپا ئاریزابالاگا لەسەر رۆیشتنی لەگەڵ ئارسیناڵ دانوستان بکات. وەکوو ئەوەی سەرەتا لەلایەن تۆڕی ئاتلێتیکەوە بڵاوکرایەوە و لەلایەن رۆژنامەی ئاسەوە پشتڕاستکرایەوە، ئەو گرێبەستەی کە واژۆی کردبوو مەرجێکی هەڵوەشاندنەوەی بە بەهای پێنج ملیۆن پاوەند لەخۆدەگرت، کە رێگەی پێدەدا یانەکە جێبهێڵێت ئەگەر هەر یانەیەکی دیکە هاوتای ئەو بڕە پارەیە بدات کە ئارسیناڵ هاوینی رابردوو بە چێڵسی دابوو. بەڵام، ئەو مەرجە ئێستا بەسەرچووە.

ئەگەرچی ئارسیناڵ رێگری لە رۆیشتنی ناکات، بەڵام کێپا دەبێت لەگەڵ یانەکەدا بگاتە رێککەوتن. دوای ئەوە گەنەرز پێویستی بە دۆزینەوەی گۆڵپارێزێکی دووەمی باوەڕپێکراو دەبێت کە بتوانێت ئەو ئاستە بەرزە بپارێزێت کە کێپا لە وەرزی 2025-2026 پێشکەشی کرد و بەردەوام رایا لەژێر فشاردا بهێڵێتەوە. گرانبەهاترین گۆڵپارێزی جیهان دەرگای بۆ رۆیشتن واڵا کردووە و پاڵەوانەکانی ئێستای پرێمەرلیگیش چاوەڕوانن بۆ ئەوەی ببینن ئایا پێویستیان بە چوونە نێو بازاڕی گواستنەوەکان دەبێت یان نا.