دوای کرانەدەرەوەیان لە مۆندیال؛ سێنیگال تەواوی ستافی راهێنەرایەتی هەڵبژاردەکەی دووردەخاتەوە
فیدراسیۆنی تۆپی پێی سێنیگال گرێبەستی پاپی تیاو و ستافەکەی هەڵوەشاندەوە
یاریگا –
پاپی تیاو و تەواوی ستافەکەی لە پۆستی راهێنەرایەتی سێنیگال دوورخرانەوە.
پێگەی wiwsport ـی سێنیگالی لە زاری چەند سەرچاوەیەکی نێو فیدراسیۆنی تۆپی پێی وڵاتەکە بڵاویکردووەتەوە، کۆبوونەوەیەکی بەپەلە کە رۆژی شەممە بەڕێوەچوو، بڕیاری دوورخستنەوەی پاپی تیاو پەسەند کرا، ئەمەش تەنیا زیاتر لە هەفتەیەک دوای ماڵئاواییکردنیان لە مۆندیالی 2026، هاوکات بڕیارەکە تەواوی ستافی هونەرییش دەگرێتەوە و سوپاسی کارەکانیان کراوە.
🚨 Pape Thiaw et l’ensemble du staff technique des Lions limogés par la Fédération Sénégalaise de Football !#FSF #Senegal #wiwsport pic.twitter.com/yFyzQC5V4q
— wiwsport (@wiwsport) July 12, 2026
دوانزە رۆژ دوای کۆتاییەکی خەمناک لە مۆندیالدا، بڕیارە یەکلاییکەرەوەکە درا؛ پاپ تیاو، کە لە ماوەی پاڵەوانێتییەکەدا لە ئەمریکای باکوور رووبەڕووی رەخنەیەکی زۆر بووەوە، نەیتوانی لە باجی کرانەدەرەوەیان و ئەو شکستە چاوەڕواننەکراوەی بەرامبەر بەلجیکا لە قۆناخی 16 رزگاری بێت.
تیاو لە کانوونی یەکەمی ساڵی 2024 بەفەرمی وەکوو راهێنەری سێنیگال دەستنیشانکرا، ئەمەش دوای ئەوەی بەکاتی شوێنی ئالیۆ سیسیێ، راهێنەری پێشووی گرتبووەوە.
تیاو توانی دۆخەکە ئاسایی بکاتەوە و یارمەتی سێنیگال بدات بۆ بردنەوەی دووەم نازناوی جامی نەتەوەکانی ئەفریقا لە مەغریب، لە کانوونی دووەمی 2026.
بەڵام ئاستی کێبڕکێیەکان لە مۆندیال زۆر لەوە بەرزتر بوو کە چاوەڕوان دەکرا، ستافە هونەرییەکەشی بەدەر نەبوون لەم شکستە و یەکێتییەکە بڕیاریدا بە یەکجاری کۆتایی بە کارەکانی ئەوانیش بهێنێت.
