داڕێژەری پلانەکانی نەرویج؛ لە کێشە لەگەڵ گواردیۆلاوە بۆ نوسینەوەی مێژوو لە مۆندیال

یاریگا –

ستۆڵ سۆلباکن لەگەڵ نەرویج لە مۆندیالدا مێژوو دەنووسێتەوە، بەڵام ساڵانێک پێش سەرکەوتنی وەکوو راهێنەری تیمی نیشتمانی، بەهۆی رووبەڕووبوونەوەیەکی توند لەگەڵ پێپ گواردیۆلا بووە سەردێڕی هەواڵەکان. رووداوەکە لە ساڵی 2010 روویدا، دوای یارییەکی چامپیۆنزلیگ لەنێوان کۆپنهاگن، کە ستۆڵ سۆلباکن راهێنەرایەتی دەکرد و بارسێلۆنای گواردیۆلا.

کێشەکە لەسەر خۆسێ مانوێل پینتۆی گۆڵپارێزی یەدەکی بارسێلۆنا بوو. لە یارییەکی پێشووتری چامپیۆنزلیگدا، پینتۆ لاسایی دەنگی فیکەی ناوبژیوانی کردبووەوە بۆ سەرلێشێواندنی یاریزانێکی رکابەر، رووداوێک کە بووە هۆی سزادان و راگرتنی لەلایەن یوێفا.

ئەم رووداوە بووە هۆی رەخنەی زۆر کەس، لەوانەش ستۆڵ سۆلباکن، کە پێش یاریی گەڕانەوە بەرامبەر بارسێلۆنا، بە ئاشکرا پینتۆی وەکوو “كەسێکی سەربەکێشە” ناوبرد.

ئەو لێدوانانە گواردیۆلای تووڕە کرد. دوای یارییەکە، پێپ لەبەردەم کامێراکانی تەلەڤیزیۆن و بینەراندا رووبەڕووی ستۆڵ سۆلباکن بووەوە و رەخنەی لە لێدوانەکانی گرت. ستۆڵ سۆلباکن رەتیکردەوە پاشەکشە بکات و دەمەقاڵێیەکە بە خێرایی گەورە بوو.

پێویست بوو هەردوو راهێنەرەکە لەلایەن یاریزانەکانەوە، لەوانەش سێرجیۆ بۆسکێس، لەیەکتر جیا بکرێنەوە، پێش ئەوەی رووبەڕووبوونەوەکە لەنءێو تونێلی یاریزاناندا بە هاوارکردن و سووکایەتیکردن بەردەوام بێت.
دواتر، گواردیۆلا روونکردنەوەی لەسەر پەرچەکردارەکەیدا و گوتی:

ناکرێت تۆ داوا بکەیت پینتۆ بۆ ماوەی چوار یاری رابگیرێت و بە کەسێکی سەربەکێشە ناوی ببەیت، راهێنەر نابێت ئەو کارە بکات. ئەو دەبێت خەمی سانتین و یاریزانەکانی خۆی بێت. کاتێک ئەو لێدوانانەم بیست، دڵگران بووم.

پێپ هاوکات پشتڕاستی کردەوە کە دۆخەکە لە کۆتاییدا چارەسەر بوو و زیاتر رۆیشتنی بەخۆوە نەبینی.

لە ماوەی ساڵانی رابردوودا، پەیوەندیی ستۆڵ سۆلباکن لەگەڵ گواردیۆلا بە شێوەیەکی بەرچاو گۆڕا. راهێنەرە نەرویجییەکە دواتر بە ئاشکرا ستایشی گواردیۆلای کرد و دانی بە لێهاتوویی تاکتیکی و دەستکەوتەکانیدا نا.

هەردووکیان هاوکات ناچار بوون هەماهەنگی بکەن لەسەر قورسایی کارەکانی ئێرلینگ هاڵاند، بۆ هاوسەنگکردنی پابەندبوونی ئەم هێرشبەرە لەگەڵ یانەکەی و تیمی نیشتمانی، بەڵام ئەوان هیچ کاتێک رووبەڕووبوونەوەیەکی دیکەی هاوشێوەی ئەوەی کۆپنهاگنیان ئەزموون نەکردووەتەوە.
ئەمڕۆ ستۆڵ سۆلباکن، نەرویجی بەرەو سەرکەوتووترین قۆناخ لە مێژووی وڵاتەکەدا بردووە.

لەژێر سەرپەرشتیی ئەودا، تیمەکە بە سەرکردایەتیی مارتین ئۆدیگارد، ئێرلینگ هاڵاند، ئالێکساندەر سۆرلۆت و کەسانی دیکە، 35 بردنەوە، 12 یەکسانبوون و 13 دۆڕانی تۆمارکردووە، ئەمەش بەرزترین رێژەی سەرکەوتنی لە مێژووی نەرویجدا پێدەبەخشێت کە 67%ـە.

ئەو هاوکات نەرویجی دوای 28 ساڵ گەڕاندەوە بۆ مۆندیال، کە ئەمەش وەکوو یەکێک لە گەورەترین دەستکەوتەکان لە مێژووی تۆپی پێی وڵاتەکەدا دادەنرێت.