رووبەڕووی فشار دەبێتەوە؛ یاریزانێک کێشە بۆ پێکهاتەی تۆماس تۆخێل دروست دەکات

یاریگا –

تۆماس توخێل دوای یەکسانبوونی ئینگلتەرا لە بەرامبەر تیمی نیشتمانیی تۆپی پێی گانا رووبەڕووی فشارێکی زۆربووەوە لەسەر هەڵبژاردنی پێکهاتەکەی کە تێیدا زۆربەی سەرنجەکان لەسەر ئانتۆنی گۆردن بوون.

ئەم باڵە ئینگلیزییە کە بەم دواییانە گواستنەوەیەکی گەورەی بۆ یانەی بارسێلۆنا تەواو کردووە هێشتا نەیتوانیوە کاریگەرییەکی بەرچاو لە مۆندیالدا دروست بکات و هاوکات مارکوس راشفۆرد کە رکابەری سەرەکییەتی لە باڵی چەپدا بەردەوامە لە بەهێزکردنی پێگەی خۆی بۆ بەدەستهێنانەوەی شوێنێک لە پێکهاتەی سەرەکیدا.

چیڕۆکی ئەم دوو یاریزانە لە نزیکەوە بە یەکدییەوە بەستراوەتەوە چونکە بەگوێرەی راپۆرتەکان گۆردن بە بڕی 80 ملیۆن یۆرۆ چووەتە بارسێلۆنا و بە شێوەیەکی کاریگەر جێگەی راشفۆرد دەگرێتەوە کە گەڕاوەتەوە بۆ یانەی مانچێستەر یونایتد و ئێستا ئەوان خۆیان لە کێبرکێیەکی راستەوخۆدا دەبیننەوە بۆ بەدەستهێنانی پێگەی سەرەکی لەگەڵ ئینگلتەرا.

لە کاتێکدا گۆردن بەدەست نەبوونی گۆڵکردن، ئەسیست، یان ساتە هێرشبەرییە دیارەکانەوە دەناڵێنێت، بەڵام توخێل بایەخ بە لایەنەکانی دیکەی یارییەکەی دەدات چونکە هەڵبژاردەی کرواتیا بەشێوەیەکی بەرچاو بەشداریی لە پەستان و پێکهاتەی بەرگریی ئینگلتەرادا کرد کە ئەمەش کوالێتییەکە بە تەواوی لەگەڵ شێوازی تاکتیکیی راهێنەرە ئەڵمانییەکەدا دەگونجێت.

بەڵام هاندەران بە شێوەیەکی بەردەوام داوای دەرکەوتنی هێرشبەریی زیاتر دەکەن چونکە ئەوان دەیانەوێت بڕین، کارە یەکلاکەرەوەکان و ئەو یاریزانانە ببینن کە توانای گۆڕینی یارییەکەیان بە شێوازی تاکەکەسی هەیە کە ئەمەش ئەو کوالێتییانەن زۆرجار بە راشفۆردەوە دەبەسترێنەوە.

گۆردن خۆی وا دیارە هەست بە قورسایی چاوەڕوانییەکان دەکات چونکە وەکوو بەشداربوویەکی یەکەمجاری مۆندیال و یەکێک لە گرانترین گواستنەوەکانی هاوین لە هەر یارییەکدا بە وردی چاودێریی دەکرێت و تاوەکوو ئێستا ئەو نە زۆر درەوشاوەتەوە و نە بە شێوازێکی کارەساتباریش شکستی هێناوە بەڵام ئەو نەبوونی کاریگەرییە بووەتە جێگەی نیگەرانی.

بەرگریکاریی پێشووی ئینگلتەرا، گاری نێڤیل کورتەی دۆخەکەی لە پۆدکاستی ستیک تۆ فوتبۆڵ خستەڕوو و گوتی:

ئانتۆنی گۆردن پێدەچێت ئەو یاریزانە بێت کە ئێستا لەژێر زۆرترین فشاردا بێت. هەموومان پێمان وابوو کە رەنگە بە شێوەیەکی سەرەکی بەرامبەر گانا یاریی نەکات. پێمان وابوو راشفۆرد دێتە ناوەوە بەڵام گۆردن لە تیمەکەدا مایەوە. پێم وایە ئەو ئێستا لەژێر فشاردایە. رەنگە بۆ ئەو سەخت بێت پێگەکەی بپارێزێت.

لە لایەکی دیکەوە راشفۆرد بە بەردەوامی بەشداریی ئەرێنی لەسەر کورسیی یەدەکەوە کردووە، چونکە چوارەم گۆڵی ئینگلتەرای لە یەکەم یاریی تیمی خۆیاندا کرد و دوای هاتنە ناوەوەی لە بەرامبەر گانا چالاکانە دەرکەوت، ئەمەش پاڵنەری زیاتری بەو داواکارییانە بەخشی کە داوای بەشداربوونی ئەو بە شێوەی سەرەکی دەکەن.

سەرەڕای ئەوەش، بەلای توخێل بڕیارەکە لە ئامارەکان تێپەڕ دەبێت چونکە گۆردن پابەندبوونی تاکتیکیی گەورەتر، ئاستی بەرگری و هاوسەنگی لەنێو پێکهاتەی تیمەکەدا دابین دەکات و راشفۆرد پێشبینینەکردن و تەقینەوە دەهێنێت بەڵام دەکرێت بژاردەیەکی پڕ مەترسیتر بێت. لانی کەم بۆ ئێستا وا دیارە توخێل لەپێشینەی کارەکانی دەدات بە رێکخستنی بەکۆمەڵ نەوەکوو بەهرەی تاکەکەسی و ئەمەش ئەوە دەگەیەنێت کە گۆردن وەکوو بەربژێری سەرەکی بۆ پاراستنی پێگەکەی دەمێنێتەوە، تەنانەت لە کاتێکدا گفتوگۆکان لەسەر باڵی چەپی ئینگلتەرا بەردەوامن لە چڕبوونەوە.