10 ملیۆن یۆرۆ رەتدەکاتەوە؛ خولیان ئالڤارێز دەرگای رۆیشتن دەکاتەوە

یاریگا –

خولیان ئالڤارێز ئۆفەری نوێکردنەوەی گرێبەستەکەی بە بڕی 10 ملیۆن یۆرۆ پشتگوێ دەخات و ویستی خۆی بۆ چوونە نێو پڕۆژەیەکی بەهێزتر دەردەبڕێت. خەونی ئەو یاریکردنە بۆ یانەی بارسێلۆنا، بەڵام هەر ئۆفەرێک کە کەمتر بێت لە 150 ملیۆن یۆرۆ ئاتلێتیکۆ مەدرید گوێ لێناگرێت.

ئەگەرچی گرێبەستەکەی تاوەکوو ساڵی 2030ـە و مەرجی هەڵوەشاندنەوەی بە بڕی 500 ملیۆن یۆرۆیە، دەبوو کۆتایی بە هەر دەنگۆیەکی داهاتووی لە ئاتلێتیکۆ بهێنێت، بەڵام ماڵاواییکردنی خولیان ئالڤارێز پێش بەڕێکەوتنی بۆ جامی جیهانی نەدەتوانرا لەمە بێهیواکەرتر بێت بۆ بەڕێوەبەرانی یانەکە. هێرشبەرە ئەرجەنتینییەکە هیچ مەیلێکی بۆ واژۆکردنی ئەو پێشنیازی نوێکردنەوەیەی کە بۆ چەندین مانگە لەسەر مێزەکەیە نییە و لە 26ـی ئازاردا لە لایەن رۆژنامەی مارکاوە ئاشکرا کرا، کە دەبووە هۆی ئەوەی ببێتە خاوەنی بەرزترین مووچە لە پێکهاتەکەدا بە بڕی 10 ملیۆن یۆرۆ بۆ هەر وەرزێک، چونکە ئەو پێی باشترە پەیوەندی بە پڕۆژەیەکی بەهێزترەوە بکات، کە بە تایبەتی پڕۆژەکەی بارسێلۆنایە.

بەهۆی ئەو دەنگۆیانەی کە لە سەرەتای وەرزەکەوە لە دەوری ئەو یاریزانە هەیە و بێوەڵام مانەوەی ئۆفەرەکەی ئاتلێتیکۆ، نیگەرانییەکان لە یاریگای میترۆپۆلیتانۆ لە هەفتەکانی دواییدا تەواو ئاشکرا ببوون. بەڵام دوای ئەوەی “جاڵجاڵۆکەکە” مەیلی خۆی گەیاند، بابەتەکە بە فەرمی بووە درامایەکی درێژخایەن. ماتیۆ ئەلیمانی، بەڕێوەبەری وەرزشیی ئاتلێتیکۆ، ئێستا دەزانێت کە خولیان ئالڤارێز پڕۆژەیەکی باشتری دەوێت لەوەی کە بڕوای وایە ئاتلێتیکۆ دەتوانێت پێشکەشی بکات.

لەم رووەوە، پەیامەکەی نەدەتوانرا لەمە کاریەگرتر بێت؛ خولیان دەیەوێت پەیوەندی بە پڕۆژەیەکەوە بکات کە تموحی زۆر زیاتری هەبێت و لە نازناوەکان نزیکی بکاتەوە، بێ ئەوەی گوێ بە گۆڕینی پێگەی خۆی بدات لە ئەستێرەی یەکەمی ئاتلێتیکۆوە بۆ بوون بە یاریزانێکی پاڵپشت لە پشت لامین یامال، رافینیا و هاوڕێکانی لە کامپ نۆو، رێک هاوشێوەی چۆنیەتی بوونی بە پاڵەوانی جیهان لە کاتێکدا سەرنجەکان لەسەر لیۆنێل مێسی بوون.

پەیوەندییەکی باش لەگەڵ چۆلۆ

ئەم بڕیارە هیچ پەیوەندییەکی بەو چیرۆکانەوە نییە، کە دەوروبەرەکەی بڵاوی دەکەنەوە وەکوو پاساوێک بۆ ئەگەریی رۆیشتنی، کە گوایە بەهۆی خراپیی پەیوەندییەکەی یان شێوازی یاریی دیێگۆ سیمیۆنییەوەیە. هیچ کەسێک دوو هاوین لەمەوبەر زیاتر لە چۆلۆ هەوڵی بۆ هێنانی ئەو نەدا و جاڵجاڵۆکەکە باشترین وەرزی کاروانی وەرزشیی خۆی لەژێر سەرپەرشتی ئەودا بەڕێکرد، کە دوو باشترین وەرزی گۆڵکردنی لە ئاستی باڵادا بە 20 گۆڵ یان زیاتر لەژێر دەستی سیمیۆنیدا بوو و راهێنەرەکەش بە بەردەوامی لە رووی گشتی و تایبەتییەوە پاڵپشتی لێ دەکرد، لە ماوەی ئەو وشکەساڵییەی گۆڵکردنەدا کە بۆ ماوەی نزیکەی چوار مانگ لەم وەرزەدا بەدەستییەوە دەیناڵاند. بە هەمان شێوە، ئەگەر ئاتلێتیکۆ لەم وەرزەدا نەیتوانیبێت نازناو بەدەستبهێنێت، ئەمە بەشێکی بەهۆی ئەو لێدانی سزایەوە بوو کە خودی هێرشبەرەکە لە یەکلاکردنەوەی لێدانە سزاکانی یاریی کۆتایی جامدا لەدەستیدا.

بەدەر لەو گورزەی کە بەر سیمیۆنی دەکەوێت، مەیلی خولیان ئالڤارێز ئاتلێتیکۆ لە دۆخێکی قورسدا جێدەهێڵێت. لە رووی گشتییەوە، هەڵوێستی یانەکە نەرمیی تێدا نییە و ئاماژە بە گرێبەستەکەی و مەرجی هەڵوەشاندنەوەی دەکەن کە هێزیان پێدەبەخشێت. بەڵام ئەوەش دەزانن کە مەیلی هێرشبەرەکە و بە تایبەتی بریکارەکەی فێرناندۆ هیدالگۆ، وەرزی هاوین دەکاتە درامایەکی راستەقینە.

لە میترۆپۆلیتانۆ ئەوەیان فەرامۆش نەکردووە کە ئەو بریکارە نزیک بوو پرۆسەی گواستنەوەکەی لە مانچێستەر سیتییەوە تێکدات، کاتێک هەموو شتێک جێبەجێ کرابوو و تیمەکە لە گەشتێکدا بوو لە هۆنگ کۆنگ و چاوەڕێی رەزامەندیی کۆتایی دەکرد، پێش ئەوەی داوای بەڵێنێک بکات کە خەریک بوو میگێل ئانخێل خیل مارین ناچار بکات پرۆسەکە هەڵبوەشێنێتەوە. هەر لەبەر ئەمەشە کە سەرسام نین بەوەی لەو کاتەوەی خولیان گەیشتووەتە ئەتلەتیکۆ و بە تایبەتی لە سەرەتای ئەم وەرزەوە، خەڵکی دەوروبەری بەردەوامن لە شڵەقاندنی دۆخەکە، بە تایبەتی لەگەڵ هەبوونی بارسێلۆنا وەکوو هاوپەیمانێک.

هەموو سیناریۆکان کراوەن

هەموو سیناریۆکان بە کراوەیی دەمێننەوە و هەڵوێستی ئاتلێتیکۆش پتەوە؛ ئەگەر خولیان ئالڤارێز دەیەوێت بڕوات، ئەو تەنیا بەرامبەر بڕە پارەیەکی گەورەی گواستنەوە دەتوانێت ئەوە بکات، کە هەرگیز لە 150 ملیۆن یۆرۆ کەمتر نابێت. هێشتا گفتوگۆ لەنێو میترۆپۆلیتانۆدا هەیە، بە جۆرێک هەندێک دەنگ دەیانەوێت تەواو توند بن، لە کاتێکدا هەندێکی دیکە پێیان وایە ئەمە دەکرێت دەرفەتێکی باش بێت بۆ بەدەستهێنانی پارە و پێدانی دەسەڵاتی زیاتر بە ماتیۆ ئالیمانی بۆ بنیاتنانی پڕۆژەکەی.

ئەوەی کە کەس گومانی لێی نییە ئەوەیە کە ئاتلێتیکۆ رۆیشتنی ئەو ئاسان ناکات، بە تایبەتیش بۆ بارسێلۆنا. لە راستییدا، ئەگەرچی خوان لاپۆرتا خەون بە خولیانەوە دەبینێت، بەڵام ئاتلێتیکۆ بڕوای وایە کە یانە کاتالوونییەکە توانای دارایی نییە بۆ پێشکەشکردنی ئۆفەرێک کە ئەوان قایل بکات، چونکە هەندێک تەنیا پارەی کاشیان دەوێت، لە کاتێکدا هەندێکی دیکە لارییان نییە لە تێکەڵکردنی یاریزانانی وەکوو فێران تۆرێس، کە یاریزانێکە ماتیۆ زۆر بەدڵییەتی.

هەر لەبەر ئەمەشە کە ئاتلێتیکۆ بە ئەستەمی نازانێت کە دوای کۆتاییهاتنی هاوین، جاڵجاڵۆکەکە جگە لە بەردەوامبوون لە تەواوکردنی گرێبەستەکەی هیچ بژاردەیەکی دیکەی نەبێت.