رۆژی ماڵاواییەکان؛ لە دوایین گەڕی پرێمەرلیگ چی لە مەترسیدایە؟

یاریگا –

ئەمڕۆ رۆژی ماڵاوایییەکانە لە پرێمەرلیگدا. هەموو کۆتایی وەرزێک بەم شێوەیەیە، بەڵام ئەم یەکشەممەیە لە مێژووی مانچێستەر سیتی و لیڤەرپوولدا بە تایبەتی تۆمار دەکرێت.

لە سیتی، پێپ گواردیۆلا و بێرناردۆ سیلڤا یانەکە جێدەهێڵن. ئەو راهێنەرە کۆتایی بە ماوەی 10 ساڵ کارکردن لە سیتیزن دەهێنێت؛ سەرکەوتووترین سەردەم لە مێژووی یانەکەدا، بە بردنەوەی 20 نازناو لەو کاتەوەی گواردیۆلا لە ساڵی 2016 پەیوەندی بە یانەکەوە کرد.

ئەمڕۆ پێپ بەرامبەر ئاستۆن ڤێلای ئۆنای ئێمری بۆ دوایین جار سەرپەرشتیی سیتی دەکات، لە دوایین گەڕی وەرزی 2025-2026ـی پرێمەرلیگدا. بێرناردۆ سیلڤاش یانەکە جێدەهێڵێت، کە لە ساڵی 2017ـەوە یەکێک بوو لە کۆڵەکە سەرەکییەکانی سیتییەکەی گواردیۆلا.

یاریگای ئانفێڵدیش پاشنیوەڕۆیەکی سۆزداریی بەڕێ دەکات، چونکە محەمەد سەڵاح کە لە ساڵی 2017 لە رۆماوە هات و ئاندی رۆبێرتسن کە لە هەمان ساڵدا لە هۆڵ سیتییەوە گرێبەستی لەگەڵدا واژۆ کرا، لیڤەرپوول جێدەهێڵن. هەردووکیان ئێستا ئەفسانەی رێدزن، کە هەموو شتێکیان لەگەڵ یانەکە بردەوە، لەوانەش نازناوێکی چامپیۆنزلیگ و دوو نازناوی پرێمەرلیگ.

چی لە مەترسیدایە؟

بەڵام لە دەرەوەی ماڵاوایییەکان، بە رۆیشتنی ئاندۆنی ئیراولا لە بۆرنمس دوای کارە ناوازەکەی ئەو راهێنەرە باسکییە، هێشتا لەم دوایین گەڕەی پرێمەرلیگدا شتی زۆر هەیە بۆ یەکلاکردنەوە. بۆ نموونە، دوایین پێگەی دابەزین بۆ چامپیۆنشیپ، لەپاڵ بێرنلی و وۆڵڤزدا کێبڕکێی لەسەر دەکرێت.

ساڵێک دوای بردنەوەی  یۆرۆپالیگ، تۆتنهام ئەمڕۆ بۆ مانەوە دەجەنگێت؛ ئەوان بە 38 خاڵ لە پلەی 17ـی رێزبەندییەکەدان و تەنیا دوو خاڵ لە سەرووی ناوچەی دابەزینەوەن کە ئێستا وێستهام بە 36 خاڵ داگیری کردووە. تۆتنهام ئەمڕۆ میوانداریی ئێڤەرتنی پلەی 12 دەکات، لە کاتێکدا وێستهام رووبەڕووی لیدز یونایتدی پلەی 14 دەبێتەوە.

لەگەڵ دەرکەوتنی ناسنامەی پاڵەوان لە رۆژی سێشەممە، کە ئارسیناڵە، هەروەها سەرکەوتنی پێشوەختەی سیتی، مانچێستەر یونایتد و ئاستۆن ڤێلا بۆ چامپیۆنزلیگ، پێگە ئەوروپییەکانی دیکە هێشتا بە تەواوی یەکلایی نەبوونەتەوە:

• لیڤەرپوول؛ کە میوانداریی برێنتفۆرد دەکات، لە رووی ماتماتیکییەوە سەرکەوتنی بۆ چامپیۆنزلیگ مسۆگەر نەکردووە، بەڵام کردەییانە سەرکەوتووە. ئەوان بە سێ خاڵ لەپێش بۆرنمسەوەن و خاوەنی جیاوازییەکی باشترن لە گۆڵدا. ئەگەر ڤێلا بەرامبەر سیتی بدۆڕێت و لیڤەرپوول بباتەوە، تیمی پلەی شەشەم لە پرێمەرلیگ بۆ چامپیۆنزلیگ سەردەکەوێت.

• شەڕی پێگە ئەوروپییەکان؛ ململانێی پێگە ئەوروپییەکان بە دوو پێگەکەی یۆرۆپالیگ و پێگەکەی کۆنفرانسلیگەوە، چەندین یانە دەگرێتەوە کە لە خشتەی خوارەوەدا روون کراونەتەوە: