یەکەم بڕیاری گەورەی مۆرینۆ دوای گەڕانەوەی بۆ ریال مەدرید ئاشکرا دەکرێت

یاریگا –

تاوەکوو پرۆسەی هەڵبژاردنی سەرۆکایەتی کۆتایی نەیەت، راهێنەرە پۆرتوگالییەکە بە فەرمی راناگەیەنرێت.

جۆزێ مۆرینیۆ دەبێتە راهێنەری داهاتووی ریال مەدرید. دوای ئەوەی چابی ئالۆنسۆ و ئالڤارۆ ئاربێلوا نەیانتوانی کۆنترۆڵی تیمەکە بگرنە دەست، فلۆرێنتینۆ پێرێز و دەستەی بەڕێوەبردنی روویان لە راهێنەرە پۆرتوگالییەکە کردووە بۆ چاککردنەوەی ژووری خۆگۆڕینێک کە بە تەواوی تێکچووە دوای وەرزێکی دیکەی بێ نازناو.

رۆژی یەکشەممە ئەمە لە لایەن ئانتۆن میانا لە بەرنامەی Carrusel Deportivo روونکرایەوە، کە تێیدا یەکەم وردەکارییەکانی چالاکییەکی ئاشکرا کرد کە تەنیا لەسەر کات وەستاوە:

گەڕانەوەی مۆرینیۆ پێشتر گفتوگۆی لەسەر کراوە و کۆتایی هاتووە،دوای کۆتا گەڕی خولەکە رادەگەیەنرێت.

ئەی بۆچی چاوەڕێ بکەن تاوەکوو ئەو کاتە ئەگەر رێککەوتنەکە پێشتر کۆتایی هاتووە؟ چونکە ئەوان چاوەڕێی کۆتاییهاتنی پرۆسەی بەربژێربوونی سەرۆکایەتی دەکەن لە ریال مەدرید.

تەنیا چەند رۆژێک لەمەوبەر، رۆژی سێشەممە، فلۆرێنتینۆ پێرێز بە شێوەیەکی کتوپڕ داوای هەڵبژاردنی نوێی سەرۆکایەتی لە ریال مەدرید کرد و گوتی: “دەبێت بە زەبری هێز من لەم شوێنە دەربکەن.”

لەو کاتەوە، پرۆسەی پێشکەشکردنی بەربژێربوون کراوەیە، هەرچەندە دوور و نەگونجاو دەردەکەوێت کە کەسێک بتوانێت لە ماوەیەکی ئاوا کورتدا ئاڵەنگارییەک رێک بخات. ناوی بازرگان ئێنریکێ ریکێلمی هێنراوە، بەڵام هێشتا نەزانراوە ئایا دەتوانێت بەربژێربوونی خۆی لە کاتی خۆیدا پێشکەش بکات یان نا. هەر بۆیە هەموو شتێک بەندە بەو پرۆسەیەوە.

راگەیاندنی جۆزێ مۆرینیۆ

بە لەبەرچاوگرتنی ئەوەی پرۆسەی بەربژێربوون رۆژی شەممە 26ـی مانگ کۆتایی دێت، فلۆرێنتینۆ پێرێز هیچ هەنگاوێک پێش ئەو کاتە راناگەیەنێت و بە گوتەی ئانتۆن ماینا، کاتێک پرۆسەی پێشکەشکردنی بەربژێربوونی سەرۆکایەتی لە ریال مەدرید کۆتایی هات، جووڵەکان رادەگەیەنرێن. یەکەم و گرنگترینیان گەڕانەوەی جۆزێ مۆرینیۆ دەبێت بۆ سەر کورسی راهێنەرایەتی ریال مەدرید.

بەڵام ئەمە هەموو شتێک نییە. هەر بەگوێرەی هەمان سەرچاوە، دەستەی بەڕێوەبردنی ئێستا چاویان لە چەند یاریزانێکە لە بازاڕدا بۆ بەهێزکردنی پێگە سەرەکییەکان لەنێو یاریگا، بە تایبەتی لە هێڵی بەرگری و ناوەڕاستدا، ئاشکراشی کرد ک ئەوان هەڵسەنگاندن بۆ ناوەکان لە هەردوو پێگەکەدا دەکەن و سبەی هەوڵ دەدەین وردەکاری زیاتر لە بەرنامەی El Larguero ئاشکرا بکەین.

ماینا گوتیشی:

من باوەڕم وایە کە مەدرید پێشنیاز بۆ مۆرینیۆ دەکات، کە بەدوای رۆدری’ـدا بچێت لە سیتی. لایەنە داراییەکە دەبێت بگونجێت، رۆدری پێویستە خۆی لە نوێکردنەوەی گرێبەستەکەی بەدوور بگرێت و پێویستە ویستی جێهێشتنی سیتی هەبێت، بەڵام پێم وایە ئەو یەکێک دەبێت لە یەکەمین ناوەکان کە مۆرینیۆ لەسەر مێزەکەی دەبێت.

رۆدری هێرناندێز ئامادەیە بگەڕێتەوە ئیسپانیا

مانگی ئازاری رابردوو، رۆدری هێرناندێز لە چاوپێکەوتنێکدا ئاماژەی بەوە کرد کە گرێبەستەکەی لەگەڵ مانچستەر سیتی وەرزی داهاتوو کۆتایی دێت و ئارەزووی خۆی بۆ گەڕانەوە بۆ ئیسپانیا لە قۆناخێکی کاروانی وەرزشییدا نەشاردەوە.

دەرگاشی بە رووی ریال مەدریددا دانەخست کاتێک گوتی:

یاریکردنم بۆ ئاتلێتیکۆ مەدرید رێگری لە یاریکردنم بۆ ریال مەدرید ناکات. یاریزانانی دیکەش ئەو گەشتەیان کردووە. نەوەکوو بە شێوەیەکی راستەوخۆ، بەڵام بە تێپەڕبوونی کات. ناتوانیت گەورەترین یانەی جیهان رەت بکەیتەوە.

یاریزانێکی دیکە کە دانی بەوەداناوە کە دەیەوێت رۆژێک لە رۆژان لە مەدرید بژی، ئینزۆ فێرناندێزە لە چێڵسی، کە وەکوو دەگوترا تەنانەت لە لایەن یانەکەیەوە سزادراوە بەهۆی لێدوانەکانییەوە. لەگەڵ ئەوەشدا هەرگیز بە شێوەیەکی راستەوخۆ ناوی ریال مەدریدی نەهێناوە، بۆیە کەس بە راستی نیازەکانی ئەو نازانێت یان ئایا دەیەوێت چێڵسی بۆ یاریکردن لە ئیسپانیا جێبهێڵێت.