وەرە رزگارمان بکە؛ هاندەرانی یانەیەکی گەورەی پرێمەرلیگ چاویان لە چاڤی هێرناندێزە

یاریگا –

لایەنگرانی مانچێستەر یونایتد داوا دەکەن یاریزانەکەی پێشووی هێڵی ناوەڕاستی بارسێلۆنا لەبری مایکڵ کاریک ببێتە راهێنەری نوێی تیمەکە.

تەنیا یەک وێنە بووە هۆی دروستبوونی جۆش و خرۆشێکی گەورە لە نێوان زۆرێک لە هاندەرانی مانچێستەر یونایتد سەبارەت بە ئەگەری بینینی چاڤی هێرناندێز لەسەر کورسی یاریگای ئۆڵد ترافۆرد لەم هاوینەدا. راهێنەرەکەی ئیسپانییەکە کە چەند مانگێکە بێ یانەیە، لەلایەن بەشێکی زۆری هاندەرانی شەیتانەسوورەکانەوە بەهۆی ئەزموونەکەیەوە داوا دەکرێت و لایەنگران لە سۆشیاڵ میدیا هەستی خۆیان بە روونی دەربڕیوە.

هەموو شتێک بەهۆی وێنەیەکەوە دەستی پێکرد کە چەند رۆژێک لەمەوبەر لەلایەن یاریزانە تەمەن 46 ساڵەکەی پێشووی بارساوە بڵاوکرایەوە. لە وێنەکەدا چاڤی دەردەکەوێت کە لەگەڵ کوڕەکەیدا لەنێو شاری بارسێلۆنا پیاسە دەکات، کە کوڕەکەی درێسی مانچێستەر یونایتدی پۆشیوە. ئایا ئەمە ئاماژەیەکە یان تەنیا رێکەوتە؟ بۆ هاندەرانی یونایتد، ئەمە بووە پاساوێکی تەواو بۆ ئەوەی فشار بخەنەسەر یانەکە بۆ گواستنەوەی.
وێنەکە بە خێرایی بڵاوبووەوە و کۆمێنتەکان سۆشیاڵ میدیایان تەنی، سەرەڕای ئەوەی کاریک لەو کاتەوەی دوای دوورخستنەوەی روبن ئامۆریم ئەرکەکەی گرتووەتە دەست، تاوەکوو رادەیەک باش کاری کردووە.

“چاڤی، وەرە رزگارمان بکە”، “ئەوەندەم بینی بەسە، بیگوازنەوە، ستایلی کاریک ترسناکە”، “ئەم کابرایە بهێننە ماڵەوە، بە کردەیی داوای دەکات” و “کارگێڕی مانچێستەر یونایتد دەبێت گرێبەست لەگەڵ ئەم پیاوە بکەن، زۆر لە کاریک باشترە،” ئەمانە هەندێک لە کاردانەوەی لایەنگران بوون.