یاریگا –
“پاریس سانجێرمان – بایرن میونشن باشترین یارییە کە تاوەکوو ئێستا بینیبێتم، بەڵام ئێمە لە دوو جیهانی زۆر جیاوازدا کێبڕکێ دەکەین.”
لە کۆنگرەیەکی رۆژنامەوانیدا پێش یارییەکەیان بەرامبەر فولهام، دەربارەی یارییە پڕ لە جۆش و خرۆشەکەی چوونی قۆناخی پێشکۆتایی چامپیۆنزلیگ، لە نێوان پاریس سان جێرمان و بایرن میونشن پرسیار لە میکێل ئارتێتای راهێنەری ئارسیناڵ کرا. میکێل گوتی؛ “پێدەچێت یەکێک بێت لە باشترین ئەو یارییانەی کە تا ئێستا بینیبێتم.”
راهێنەرە ئیسپانییەکە ستایشی کوالێتی بەکۆمەڵ و تاکەکەسی هەردوو تیمەکەی کرد، بەڵام زیاتری باسکرد و تیشکی خستەسەر جیاوازی ئامادەیی لە نێوان یاریزانەکانی خۆی و ئەو یاریزانانەی کە ڤینسێنت کۆمپانی و لویس ئینریکێ راهێنەرایەتییان دەکەن.
ئارتێتا گوتی:
کاتێک سەیری خولەکەکانی یاریکردنی یاریزانەکان و ئامادەییان دەکەم، سەرسام نابم… بۆ بەرهەمهێنانی ئەو ساتە پڕ لە کوالێتییانە، پێویستە زۆر ئامادەبیت. جیاوازیی نێوان خولەکان و شێوازی کێبڕکێکردنیان وەکوو شەو و رۆژ وایە، ئێمە لە دوو جیهانی زۆر جیاوازدا کێبڕکێ دەکەین.
لە کاتێکدا بایرن پێشوەختە بووەتە پاڵەوانی بۆندسلیگا و پاریسیش خولی فەرەنسی تاوەکوو رادەیەکی زۆر مسۆگەر کردووە، ئارسیناڵ هێشتا لە پریمەرلیگ بەرامبەر مانچستەر سیتی بۆ بەدەستهێنانی یەکەم نازناوی دوای 22 ساڵ لە ململانێدایە.
بە واتایەکی دیکە، کۆمپانی و لویس ئینریکێ دەتوانن زیاتر یاریزانەکان لە خولە نێوخۆییەکاندا ئاڵوگۆڕ پێبکەن، لە کاتێکدا ئارتێتا ناچارە نزیکەی هەموو کۆتایی هەفتەیەک بە بەهێزترین پێکهاتەیەوە یاری بکات، ئەمەش دەبێتە هۆی ماندووبوونی زیاتری یاریزانەکانی.
