یاریزانێکی لاو بەشێوەیەکی تراژیدی لە گانا دەکوژرێت

یاریگا –

دۆمینیک فریمپۆنگ، یاریزانی باڵی هێرشبەری یانەی بێرێکوم چێڵسی کە تەمەنی 20 ساڵ بوو، دوای رووداوێکی توندوتیژی لە گانا گیانی لەدەستدا.

هێرشەکە رۆژی یەکشەممە ڕوویدا، کاتێک پاسی تیمەکە لە یارییەکی خولی نایابی گانا بەرامبەر یانەی سامارتێکس دەگەڕایەوە. بەگوێرەی راگەیەندراوێکی یەکێتیی تۆپی پێی گانا، هێرشبەرە چەکدارەکان تەقەیان لە پاسەکە کردووە لەو کاتەی پاسەکە ویستوویەتی بەرەو دواوە بگەڕێتەوە.

فریمپۆنگ بەهۆی بەرکەوتنی گوللە بە سەری، بە سەختی بریندار بوو و دواتر لە نەخۆشخانە گیانی لەدەستدا. دۆمینیک تەنیا قوربانیی ئەم رووداوە بوو کە گیانی لەدەست دابێت.

یەکێتیی تۆپی پێی گانا خەمباریی قووڵی خۆی بۆ ئەم کۆستە دەربڕی و رایگەیاند:

ئێمە تووشی شۆک بووین و زۆر خەمبارین بە کۆچی دوایی تراژیدیی دۆمینیک فریمپۆنگ. ئەم رووداوە تەواوی کۆمەڵگەی تۆپی پێی هەژاندووە. لەم کاتە سەختەدا پرسە و سەرەخۆشیی قووڵی خۆمان ئاراستەی خێزانەکەی، هاوتیمەکانی، راهێنەرانی و هەموو لایەک لە یانەی بێرێکوم چێڵسی دەکەین.