یاریگا –
رۆبێرتۆ دی زێربی، راهێنەری بەناوبانگی ئیتاڵی، بڕیارێکی یەکلاییکەرەوە سەبارەت بە داهاتووی دەدات.
بەگوێرەی زانیارییەکانی تۆڕی سکای سپۆرتس، دی زێربی بە هیچ شێوەیەک لەم وەرزە ناگەڕێتەوە راهێنەرایەتی هیچ یانەیەک و بڕیاریداوە تاوەکوو وەرزی داهاتوو چاوەڕێبکات.
De Zerbi, nessun ritorno immediato in panchina: la scelta solo dalla prossima stagione#SkySporthttps://t.co/2BSM6dOIim
— skysport (@SkySport) March 25, 2026
تۆتنهام و هەوڵە بێسوودەکان
هەمان سەرچاوە روونیکردووەتەوە، دوای ئەوەی لە مانگی شوباتی ڕابردوو، دی زێربی گرێبەستەکەی لەگەڵ مارسیلیای فەڕەنسی هەڵوەشاندەوە، تۆتنهام بەردەوام هەوڵی جیددی بۆ گواستنەوەی راهێنەرە 46 ساڵانییەکە داوە، بەتایبەت دوای دوورخستنەوەی تۆماس فرانک. هەرچەندە تۆتنهام ئێستا لە بارودۆخێکی خراپدایە و مەترسی دابەزینی لەسەرە، بەڵام دی زێربی ئامادە نییە لەم کاتە هەستیارەدا ئەرکەکە بگرێتە ئەستۆ.
ستراتیژی چاوەڕوانی
سکای سپۆرتس ئاماژە بەوەش دەکات، ئەم بڕیارەی دی زێربی پەیوەندی بە یانەیەکی دیاریکراوەوە نییە، بەڵکوو دەیەوێت پشوویەک بدات و بە هێمنی هەموو ئەو دەرفەتانە هەڵسەنگێنێت کە لە کۆتایی وەرزدا بۆی دەڕەخسێن. راهێنەرە ئیتاڵییەکە باوەڕی وایە دەستپێکردنی پڕۆژە لە سەرەتای وەرزەوە زۆر سەرکەوتووتر دەبێت وەک لەوەی لە ناوەڕاستی وەرزدا وەک ‘فریادڕەس’ دەست بەکار بێت.
کێبڕکێ لە هاویندا
بەهۆی شێوازە سەرنجڕاکێشەکەی لە یاریکردن، چاوەڕوان دەکرێت لە هاوینی 2026ـدا، کێبڕکێیەکی بەهێز لە نێوان یانە گەورەکانی ئەوروپا دروست ببێت بۆ بەدەستهێنانی واژۆی دی زێربی. تاوەکوو ئەو کاتە، هاندەرانی تۆپی پێ دەبێت چاوەڕێ بکەن بۆ بینینەوەی دی زێربی تاوەکوو چێژ لە شێوازە هێرشبەرییەکەی وەربگرن.
دی زێربی لە ساڵی 2024 لە دوای جێهێشتنی بڕایتنی ئینگلیزی ئەرکی راهێنەرایەتی مارسیلیای گرتەدەست. لە سەرجەم پاڵەوانێتییەکان لە 69 یارییدا سەرپەرشتی یانە فەڕەنسییەکەی کرد، 39 یاریی بردەوە، لە 8 یارییدا یەکسان بووە و 22 یاریشی دۆڕاندووە.
