یاریگا –
خوان گارسیا، گۆڵپارێزی بارسێلۆنا ئاشكرایكرد هانزی فلیک راهێنەری ئەڵمانی هۆكاری سەرەكی پەیوەندیكردنی بە یانەكەوە بووە.
خوان گارسیا لە هاوینی ئەمساڵدا بە بەهای 25 ملیۆن یۆرۆ لە ئیسپانیۆلەوە پەیوەندی بە بارسێلۆناوە كرد و تاوەكو 2031 گرێبەستی لەگەڵ ئەو یانەیە واژۆكرد.
#LaPortada Entrevista con Joan García: “Ni antes LaLiga estaba ganada, ni ahora perdida” pic.twitter.com/wwrOJdVgqE
— MARCA (@marca) February 20, 2026
خوان گارسیا لە لێدوانێكدا بۆ رۆژنامەی ماركا گوتی:
کاتێک بارسێلۆنا منی ویست، لەگەڵ نزیکەکانم و خێزانەکەم قسەم کرد، هەواڵێکی زۆر خۆش بوو کە یەکێک لە باشترین یانەکانی جیهان گرنگیم پێ بدات، دوای ئەوەی تاوتوێی بابەتەکەمان کرد، بڕیارە گونجاوەکەمان دا.
بارسێلۆنا یانەیەكە زۆر بۆ من گونجاوە، هەروەها ژووری جلگۆڕین پڕە لە گەنجی وەکو من، گرنگترین شت ئەوەیە کە یانەکە لەگەڵ بیرکردنەوەی مندا لە گەڕان بەدوای بەدەستهێنانی نازناوە گەورەکاندا دەگونجێت.
هانزی فلیک لە سەرەتاوە ئارەزووی زۆری خۆی بۆ هاتنی من بۆ بارسێلۆنا پێ راگەیاندم، زۆر گرنگە هەست بە متمانەی راهێنەر بکەم.
کاتێک دەگەیتە یانەیەكی گەورەی وەکو ئەمە، ئاساییە رووبەڕووی کێبڕکێیەکی زۆر بۆ بەدەستهێنانی پێگەی سەرەکی ببیتەوە، بە ئارەزوویەکی زۆرەوە هاتووم بۆ سەرکەوتن و بۆ ئەوەی ببمە گۆڵپارێزی ژمارە یەک.
ناوبژیوان دەکرێت هەڵە بکات، چونکە دیمەنەکان خێران، بۆیە تەکنەلۆژیای ڤار دۆزرایەوە، بەڵام بە هەر حاڵ دەبێت تەنیا سەرنج بخەینە سەر خۆمان و بە شێوازی خۆمان بردنەوە بەدەستبهێنین.
کاری من نییە هەڵسەنگاندن بۆ ناوبژیوانان بکەم، هەندێک دیمەنی جێگەی مشتومڕ هەبوون لەم دواییانەدا، بەڵام نابێت وزەی خۆمان لەو شتانەدا بەفیڕۆ بدەین کە کۆنترۆڵمان بەسەریاندا نییە.
شێوازی یاریکردنمان باشە، بەڵام مەترسی زۆری تێدایە، ئەگەر بە باشی جێبەجێی بکەین زۆر کاریگەر دەبێت وەک ئەوەی وەرزی رابردوو روویدا، بەڵام هەر هەڵەیەک تێچوویەکی زۆری دەبێت بۆمان.
یارییەکەی بەرامبەر ئاتلێتیكۆ مەدرید قورس دەبێت، بەڵام نابێت پەلە بکەین، پێویستە پێش بیرکردنەوە لە گۆڵی دووەم، گۆڵی یەکەم بکەین و ئەو کاتە شتەکان نایاب دەبن، دەبێت لە سەرەتاوە وایان لێبکەین هەست بە ئارامی نەکەن.
توانای ئەوەمان هەیە ببینە پاڵێوراو بۆ بەدەستهێنانی خولی ئیسپانی و خولی پاڵەوانەکانی ئەوروپا، بەڵام دەبێت ئەوە لەناو یاریگادا بسەلمێنین.
پەستان لە هەموو شوێنێک هەیە، بەڵام لە بارسێلۆنا زۆر گەورەترە، چونکە تۆ پاڵێوراویت بۆ بردنەوەی هەموو نازناوەکان، پێویستە لە هەموو پاڵەوانێتییەکاندا لە لوتکەدا بیت.
بارسێلۆنا لە یاریی چوونی قۆناخی پێشكۆتایی جامی شای ئیسپانیا بە ئەنجامی چوار گۆڵی بێ وەڵام بەرامبەر ئاتلێتیكۆ مەدرید شكستیهێنا و بڕیارە سەرەتای مانگی داهاتوو یاریی گەڕانەوە بەڕێوەبچێت.
